Almatynyń mereıtoıyna halyqaralyq jyr músháırasy ótedi

ASTANA. QazAqparat - Almaty qalasynyń ákimdigi men Qazaqstan Jazýshylar odaǵy birlesip, Almaty qalasynyń 1000 jyldyǵyna oraı halyqaralyq jyr músháırasyn ótkizedi.

Músháıranyń maqsaty - san ǵasyrlyq tarıhy bar, azattyqtyń altyn besigi bolǵan Almaty qalasyn jyrǵa qosý arqyly jańa zaman ádebıetiniń búgingi kún taqyrybyna saı tyń dúnıelermen tolyǵýyna jáne tereń tarıhymyzdyń kórkem shejiresiniń jazylýyna, sondaı-aq, rýhanı ulttyq muramyz ben eldik-erlik qundylyqtarymyzdy ulyqtaýǵa, oqyrmandy ımandylyqqa, birlikke shaqyratyn, týǵan elin, Otanyn súıýge úndeıtin shyǵarmalardyń dúnıege kelýine uıytqy bolý.

Músháıraǵa Almaty qalasynyń ǵasyrlar qoınaýyndaǵy tarıhı sátterin, jeńisti, jemisti kezeńderin, sonymen qatar, qazirgi kúnniń kókeıkesti máselelerin arqaý etetin, buryn esh jerde jarııaanbaǵan poezııalyq shyǵarmalar qabyldanady. Báıgege elimizdegi jáne shetelderdegi qazaq aqyndary qatysa alady.

Úmitkerler shyǵarmalaryn kompıýterde terip, úsh danasyn búrkenshik atpen tómendegi meken-jaıǵa jiberýi kerek. Al úmitker týraly tolyq málimet (avtordyń aty-jóni, meken-jaıy, baılanys telefony) arnaıy bólek konvertke salynyp, shyǵarmamen birge joldanýy tıis.

Músháıraǵa ár avtordan úsh óleń qabyldanady. Shyǵarmalar 14-shi keglmen terilip, (aralyq ınterval 1,5), 5 betten aspaýy kerek.

Eki óleń Almaty qalasyna arnalýy shart. Úshinshi óleń erkin taqyrypta. Shyǵarmalar 2016 jyldyń 31 naýryzyna deıin qabyldanady.

Shyǵarmalar Almaty qalasy, Abylaı han dańǵyly, 105 úıge, 25-kabınetke joldanýy kerek.

Bas báıge bireý, birinshi oryn - bireý, ekinshi oryn - ekeý, úshinshi oryn - ekeý.

Músháıra qorytyndysy sáýir aıynyń ortasynda jarııalanyp, marapattaý rásimi ótedi.