Almatynyń mektepteri keshendi qaýipsizdik júıesine qosylady

ALMATY. QazAqparat - Almatynyń mektepteri men ınternattary keshendi qaýipsizdik júıesimen qamtamasyz etiledi, dep habarlaıdy QazAqparat tilshisi.

Almaty ákimdiginiń málimetinshe, qala ákimi Erbolat Dosaevtyń tapsyrmasyna sáıkes qoljetimdilikti baqylaý júıesimen jaraqtandyrý boıynsha 206 memlekettik mektep pen 8 ınternatta keshendi qaýipsizdik júıesin engizý josparlanǵan. Bul týrnıketter, beınebaqylaý kameralary, dabyl túımeleri, órt qaýipsizdigi júıesi jáne t.b. Jobany bıyl jyly iske asyrý josparlanǵan.

«Keshendi qaýipsizdik júıesi – birqatar ishki júıeleri bar ortalyqtandyrylǵan júıe, onyń quramyna beınebaqylaý júıesi , kirýdi baqylaý jáne basqarý, eki jaqty baılanys, qaýipsizdik jáne órt dabyly kiredi.
Júıeni qurýdyń maqsaty Almaty qalasynyń bilim berý mekemelerinde qoǵamdyq qaýipsizdik deńgeıin, quqyqtyq tártipti arttyrý bolyp tabylady. Ol beınebaqylaýdy jáne tirkelgen quqyq buzýshylyqtar men qaýipsizdik jaı-kúıi týraly shuǵyl qyzmetterdi ýaqtyly habardar etýdi, memlekettik mektepterde (MM) qaýipsizdikti uıymdastyrý jáne qoldaý jónindegi sheshimderdi qalyptastyrý úshin qolda bar jedel aqparatqa taldaý júrgizýdi qamtıdy», - delinedi ákimdiktiń habarlamasynda.Keshendi qaýipsizdik júıesi bilim berý nysandarynyń qaýipsizdigi men monıtorıngin qamtamasyz etýge arnalǵan:
•árbir MM-de beınederekterdi keminde 3 táýlik merzimde saqtaý, bul rette berilgen derekter derekterdi óńdeý ortalyǵynda (DÓO) keminde 30 kún saqtalady;
•tapsyrys berýshi usynatyn baılanys arnalary arqyly árbir uıymnan beınemonıtorıngtiń biryńǵaı júıesi (BMBJ) DÓO-ǵa beınederekterdi berý;
•memlekettik bilim berý nysandarynyń ǵımarattaryna kirýdi baqylaýdy qamtamasyz etý;
•Almaty qalasynyń shuǵyl qyzmetteriniń pýltine sıgnal beretin shuǵyl baılanys termınalyn (dabyl túımesi) iske qosý.

Beınebaqylaý kameralarynyń fýnktsıonaldyǵy joǵary sapada jáne sýretterdi egjeı-tegjeıli túsirýge múmkindik beredi. Derekter ınternet jelisi arqyly serverge, derbes kompıýterge nemese kez kelgen basqa da qurylǵyǵa beriledi. 30 metr qashyqtyqtaǵy ınfraqyzyl jaryqtandyrýdyń arqasynda túnde túsirý múmkindigi bar. Beınekameralardan alynǵan jazbalardy 30 kún boıy saqtaýǵa bolady.

«Búginde oqý oryndarynda barlyǵy 6 739 kamera ornatylǵan, onyń 4193-i mekteptiń ishinde, al 2546-sy syrtqa qoıylǵan. Sonymen qatar, memlekettik mektepterdiń barlyǵy mamandandyrylǵan kúzet qyzmetkerin shaqyrý múmkindigi bar dabyl túımesimen jabdyqtalǵan. Qazirgi ýaqytta Almatynyń 459 memlekettik bilim berý uıymy 16 299 kameramen jabdyqtalǵan. Olardyń ishinde 193 balabaqsha 7 344 kameramen jabdyqtalǵan. Ári 15 ınternattyq mekemede 277 kamera jáne 20 kolledjde 1503 kamera ornatylǵan. Barlyǵy 459 bilim berý uıymynda 678 dabyl túımesi ornatyldy. Al mamandandyrylǵan kúzetpen 254 bilim berý uıymy qyzmet kórsetedi», - dep habarlady Almaty ákimdiginiń baspasóz qyzmeti.