Almatynyń Medeý aýdanynda úsh júzdeı kóshege jaryq shamdary ornatylady

ALMATY. QazAqparat – Búgin Almaty qalasy ákimdiginiń baspasóz ortalyǵynda Medeý aýdanynyń ákimi Sultanbek Mákejanov qala basshysy Baqytjan Saǵyntaevtyń megapolıs kóshelerin jaryqtandyrý jónindegi tapsyrmasyn oryndaý barysy týraly aıtty, dep habarlaıdy QazAqparat tilshisi.

Eske salsaq, qala ákimi Baqytjan Saǵyntaev 2020 jyldyń sońyna deıin qala boıynsha barlyq kóshelerge jaryq shamdaryn ornatýdy tapsyrǵan bolatyn.

«Qala ákiminiń tapsyrmalaryn oryndaý maqsatynda biz byltyr kóshelerdi aralap, tekserý jumystaryn júrgizdik. Nátıjesinde jaryǵy joq biraz kóshe anyqtaldy. Ótken jyly biz 19 kóshege 1084 jaryq núktesin ornattyq», - dedi Sultanbek Mákejanov.

Sonymen qatar, ol ekinshi kezeńde B.Saǵyntaevtyń tapsyrmasy boıynsha bıyl 279 kóshe men 27 aýlaǵa 6200 jaryq shamyn ornatý josparda ekenin aıtty.

Onyń aıtýynsha, jaryqtandyrýdan bólek, olardy jóndeý jumystary jyl sońyna deıin tolyǵymen aıaqtalady.