Almatynyń Medeý aýdanynda 126 avtobýs jańartylmaq
ALMATY. QazAqparat – Almatyda qoǵamdyq kólik sapasyn jaqsartý jalǵasyp jatyr. Bıyl Medeý aýdanyna jańa 126 avtobýs satyp alynady. Bul týraly Erbolat Dosaev turǵyndarmen kezdesýinde aıtty, dep habarlaıdy QazAqparat tilshisi.
Shahar basshysynyń málim etýinshe, byltyr tasymaldaýshylar 225 jańa avtobýs satyp aldy. Osylaısha, 20 marshrýttaǵy avtobýstar jańartylyp, 1 jańa marshrýt ashyldy.
«Bıyl 8 marshrýtta 126 avtobýsty jańartýǵa nıettimiz. Jańa avtobýstardyń satyp alynýyna qaraı jumys jyl sońyna deıin josparly túrde júrgiziledi», - dedi ol.
Sondaı-aq, Erbolat Dosaev jol ınfraqurylymyn jetildirý jumystary qarqyn alǵanyn atap ótti.
«2022 jyly 27 shaqyrym jolǵa ortasha jáne 32,5 myń sharshy metr jolǵa jóndeý júrgizildi, 18 km-den astam trotýar salyndy. Bıyl 37 kóshege jóndeý júrgiziledi. Budan bólek, 50 myń sharshy metr joldy jóndeý jáne 16 kóshede 18,5 km trotýar salý josparlanǵan», - dedi ol.
