Almatynyń Medeý aýdany turǵyndaryna aýyz sý qalaı jetkizilip jatyr

ALMATY. QazAqparat - Almatyda qala turǵyndaryn sýmen qamtamasyz etý máselesi boıynsha baspasóz týry ótti, dep habarlaıdy QazAqparat tilshisi.

Baspasóz týry barysynda mamandar jýrnalısterge taýly ózenderde sýdyń laılaný deńgeıiniń joǵarylaý sebebin túsindirip, osyǵan baılanysty Almatyda aýyz sýdyń qysymy tómendegenin jáne sý berýdiń shektelgenin aıtty.
Tótenshe jaǵdaılar departamenti bastyǵynyń mindetin atqarýshy Erlan Álibekovtyń sózinshe, sońǵy 13 kúnde aptap ystyqqa taý shyńyndaǵy muzdyqtar da shydas bermeı jatyr.
Jaǵdaıǵa baılanysty morenalyq kólderdi áýeden baqylaý, tekserý jumystary toqtaýsyz júrip jatyr.

«Biz qazir áýeden sholý jasadyq, Kishi Almaty ózeninde sý deńgeıiniń joǵarylaǵanyn kórsetti. Jalpy, dál osyndaı jaǵdaı basqa ózenderdiń arnalarynda da baıqalady. Sý deńgeıiniń joǵarylaýy ózen jaǵalaýyn shaıady. Bul ózendegi bastapqy sýdyń laılanýynyń joǵarylaýyna ákeledi», - dedi ol.
Osylaısha sýmen jabdyqtaýdyń shektelýi tehnogendik másele emes, tek tabıǵı qubylystardan týyndap otyr.
Qalalyq Energetıka jáne sýmen jabdyqtaý basqarmasynyń basshysy Talǵat Malybaevtyń aıtýynsha, búgingi tańda megapolıs jer asty jáne jer ústi sýmen jabdyqtaýdyń alty negizgi kózimen qamtamasyz etilgen.
«Jer ústi kózderiniń negizgileri Kishi Almaty, Úlken Almaty, Aqsaı jáne Qarǵaly ózenderi. «Medeý» sý qabyldaǵyshy Medeý aýdanynyń batys bóligin qamtamasyz etedi. Biz sýdy súzgi stantsııasyna jetkize almaımyz, sebebi ol bitelip qalyp, qala úshin naqty tehnogendik qaýip paıda bolady. Laılaný azaıyp, sý tazarǵan kezde «Medeý» sý qabyldaǵyshy tolady», - dedi Talǵat Malybaev.

Aýyz sý tapshylyǵyn qazirgi ýaqytta Naýryzbaı aýdanynyń keı bóligi kórip otyr. Al Medeý aýdanynyń bir bóliginde sý toqtaǵaly búgin besinshi kún. Medeý aýdanynyń ákimi halyqty tirshilik nárimen qamtamasyz etý úshin tıisti sharalar qabyldanǵanyn aıtty.
«Keshe biz 8 sý tasıtyn kólikti, búgin taǵy 6 kólikti jumyldyryq, erteń olardyń sanyn 18 birlikke deıin arttyramyz. Bul rette sý mólsheri shektelmeıdi, ıaǵnı turǵyndar óz qajettilikterine sáıkes sý alady. Bıoájethanalarǵa kelsek, búgingi tańda Medeý aýdanynyń ońtústik bóliginde 28 birlik ornatyldy. Ári olardyń sany turǵyndardyń suranysy boıynsha kóbeıedi», - dedi Erkebulan Orazalın.