Almatynyń Medeý aýdany ІІB-niń laýazymdy qyzmetkerleri adam azaptady dep aıyptalýda

ALMATY. QazAqparat - Almaty qalasynyń Medeý aýdandyq ishki ister basqarmasynyń laýazymdy tulǵalary jalǵan dáleldemeler jasap, adamdy azaptady jáne zańsyz qamaýda ustady dep aıyptalyp otyr. 

Bul týraly QazAqparat tilshisi qalalyq prokýratýranyń baspasóz qyzmetine silteme jasap.

Vedomstvonyń habarlaýynsha, Medeý aýdany ІІB laýazymdy tulǵalaryna qatysty QR QK 146-babynyń 2-bólimi 1 tarmaǵy, 414-baptyń 3-bólimi, 416 baptyń 6-bólimi (Adam qınaý, zańsyz adamdy ustaý, qamaý jáne asa aýyr qylmys týraly qylmystyq iske jalǵan dálelder jasaý) boıynsha qozǵalǵan qylmystyq is sotqa joldandy.

«2015 jyldyń shilde aıynda polıtsııa qyzmetkerleri (Quny 50 mln teńgeden asatyn urlanǵan zergerlik buıymdardy anyqtaý maqsatynda) M degen azamattyń páterine ótirik aıǵaqtar qaldyryp, ony qamaýǵa alǵan. Keıin M degen azamattyń zergerlik buıymdardy urlamaǵany anyqtalyp, ony aqtaý úkimi shyǵaryldy. Atalǵan qylmystyq is boıynsha jalǵan aıǵaq keltirgeni úshin aýdan prokýratýrasy tarapynan aýdandyq polıtsııanyń burynǵy basshysy men krımınaldy polıtsııa bólimi qyzmetkerleri ústinen qylmystyq is qozǵaldy», - delingen prokýratýra habarlamasynda.

Aldyn ala sot tergeýin Almaty boıynsha sybaılas jemqorlyqqa qarsy ulttyq bıýro júzege asyrdy.

«Jumystyń aýqymdylyǵyna jáne qylmystyń aýyrlyǵyna baılanysty osy is boıynsha prokýrorlar taǵaıyndaldy, olar aldyn ala sot tergeýi bastalǵannan sotta istiń tolyq qaralyp bitkeninshe baqylaý júrgizdi. Buzylǵan konstıtýtsııalyq quqyqty qalpyna keltirý men azamattardyń zańdy múddesin jáne qylmystyq iske zańsyz tartylǵandardy qorǵaý boıynsha jumys jalǵasýda», - dep habarlady prokýratýra.