Almatynyń mánerlep syrǵanaýdan quramasy «Muz júrek» atty balalar shoýyna qatysýda
ASTANA. QazAqparat - Almatyda mánerlep syrǵanaýdan Almatynyń qurama komandasynyń 9-12 jastaǵy músheleri «Muz júrek» atty qoıylymǵa qatysýda, dep habarlaıdy Almaty qalalyq ákimdiginiń resmı saıty.
Atalǵan shoý 8-10 qańtar aralyǵynda Balýan Sholaq atyndaǵy Sport saraıynda kórsetiledi. «Olympic Ice» JShS-y qolǵa alǵan qoıylymǵa Almaty qalalyq ákimdiginiń qoldaý bildirgen.
Joba kommertsııalyq emes, odan túsken qarjynyń barlyǵy uıymdastyrýshylardyń shyǵynyn óteýge ketedi. Shoýdy uıymdastyrýdy balalardyń ata-analary óz moıyndaryna alǵan. Olar kostıýmderdi, dekoratsııany ózderi jasap, jaryq beretin kompanııalarmen kelissózdi ózderi júrgizgen, delingen habarlamada.
Qoıylymdy eń aldymen ınternattyń, balalar úıininiń tárbıelenýshileri tamashalaıdy.
«Jobanyń maqsaty - daryndy balalarymyzdy kópshilikke tanytý, konkımen mánerlep syrǵanaýdy keńinen nasıhattaý. Sol arqyly balalardy sportqa baýlý. Qoıylymǵa qatysatyn balalardy kastıng ótkizip tańdadyq. Kastıngti tanymal jattyqtyrýshylar Quralaı Ýzýrova, Aıgúl Kýanysheva, Galına Maslıýk, Azat Jabelov júrgizdi. Bul ertegige qatysqan balalar túrli baıqaýlar jeńimpazdary», deıdi «Olympic Ice» JShS-nyń dırektory ári sharany uıymdastyrýshy Dına Qystaýbaeva.
«Muz júrek» ertegisi Dısneı mýltfılmderi negizinde jasaldy. Rolderde 9 - 19 jas arasyndaǵy balalar oınaıdy. Ertegini qoıýshy Eýropa, Amerıka, Reseı shoýlarynyń rejısseri Azat Jabelov.
«Muz júrek» ertegisindegi ánderdi qazaqstandyq oryndaýshy Ademi aıtady. Ol «Novaıa volna-2015» án baıqaýynda ekinshi oryn alǵan.
