Almatynyń mádenı nysandarynda múgedek jandarǵa jaǵdaı jasalǵan ba
Monıtorıng barysynda komıssııa músheleri mádenı nysandardyń múmkindigi shekteýli jandarǵa qoljetimdiligin tekserdi.
Almaty Theatre kópsalaly mádenıet alańynan bastalǵan monıtorıng jumysynda jańa nysannyń ishi men syrtynda múgedekterge arnalǵan taktıldi navıgatsııa jasalmaǵany anyqtaldy. Bul týraly qoǵamdyq keńestiń múshesi, komıssııa tóraǵasy Bogdan Djepka málim etti.
«Teatr ádemi ári jaqsy salynǵan. Kólik turaǵy da jasalǵan. Bári durys. Degenmen, nashar kóretin jandar úshin kólik turaǵynan teatrǵa deıin taktıldi navıgatsııa jasalmaǵan», - dedi ol.
Osydan soń komıssııa músheleri «Arman» kınoteatrynda boldy. Munda da taktıldy navıgatsııa máselesi bar jáne kınoteatr ishinde múgedek jandarǵa arnalǵan oryndar joq.
«Bul – kóptegen kınoteatrlarda bar másele. Men kóbinese saýda ortalyqtaryndaǵy Chaplin Cinemas kınoteatr jelilerine baramyn. Onda biz sekildi arbaǵa tańylǵan kisilerge birshama yńǵaıly jaǵdaı jasalǵan», - dedi Bogdan Djepka.
Kelesi kezekte komıssııa músheleri Respýblıka saraıynyń aldynda arbaǵa tańylǵan jandar úshin saraıǵa kiretin baǵyttardy kórsetetin belgilerdiń joq ekenin anyqtady.
Ábilhan Qasteev atyndaǵy memlekettik óner murajaıynda pandýstar standartqa saı emes bolyp shyqty.
Abaı atyndaǵy qazaq ulttyq opera jáne balet teatrynda taktıldi navıgatsııa joq, múgedekter arbasyn kóteretin kótergish jumys istemeı tur.
Almaty qalalyq qoǵamdyq keńestiń ál-aýqat jónindegi komıssııasynyń tóraıymy Janat Qasymjanova monıtorıngty qaıta qurylǵan qoǵamdyq keńestiń músheleri jasaǵanyn aıtty.
«Biz jaqynda saılandyq jáne bul monıtorıng bizdiń josparda bolǵan. Biz áli qaladaǵy mádenı nysandardyń múmkindigi shekteýli jandar úshin qoljetimdiligin tekseretin bolamyz. Sebebi, olar – bizdiń qoǵamnyń tolyqqandy múshesi», - dedi ol.
Al qoǵamdyq keńestiń múshesi, monıtorıngtik komıssııanyń tóraǵasy Bogdan Djepka komıssııada tekserý aktisi bar ekenin, onda anyqtalǵan barlyq kemshilikter jazylatyny, keıin ol kemshilikterdi joıý úshin usynys ázirlenip, qalalyq ákimdikke joldanatynyn jetkizdi.
