Almatynyń «Kóktóbe» saıabaǵynda karantınge qaramastan attraktsıondar jumys istep kelgen
ALMATY. QazAqparat – Almatyda «Kóktóbe» saıabaǵynda karantındik shekteýlerge qaramastan attraktsıondar jumys istegen, dep habarlaıdy QazAqparat tilshisi.
Bul fakt 3 tamyz kúni, monıtorıngilik top jospardan tys tekserý júrgizgen kezde anyqtaldy. Atalǵan áreket Medeý aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasynda qaraldy.
«Bul derek boıynsha tekserý júrgizildi. Nátıjesinde shekteýge qaramastan karantın kezinde jumys istegen «Altyn Alma» jeke kásipkerlik sýbektisine qatysty sanıtarlyq talaptarǵa baǵynbaý jóninde hattama toltyrylyp, 115 aılyq eseptik kórsetkish kóleminde aıyppul salyndy. Bul - 319 myń teńge. Kásipker onyń 50 paıyzyn tóledi», - dedi brıfıngte Almaty qalasy Taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Iksan Kóbeev.
Buǵan deıin, Almatyda aýmaǵy 2000 sharshy metrden asatyn 15 nysannyń sanıtarlyq talapqa saı bolmaı shyqqany týraly jazǵan bolatynbyz.
