Almatynyń qoǵamdyq kólikterindegi «qoıandar» qandaı qýlyqqa barady
ALMATY. QazAqparat – Almatyda jyl basynan beri qoǵamdyq kólikte jol aqysyn tólemegen 113 jolaýshy ustalyp, olarǵa ákimshilik hattama toltyryldy. Bul týraly «Almatyelektrotrans» JShS bas dırektorynyń óndiris jónindegi orynbasary Omarhan Abylaıhan aıtty, dep habarlaıdy QazAqparat tilshisi.
Spıkerdiń aıtýynsha, Almatynyń qoǵamdyq kóliktegi baqylaýshylary jyl basynan beri jol aqysyn tólemegen jolaýshylarǵa baılanysty polıtsııaǵa 113 ret habarlasqan. Tıisinshe, 113 jolaýshynyń ústinen ákimshilik hattama toltyryldy.
«Keıingi kezde jolaýshylardyń jol aqysyn tólemeý úshin túrli aılaǵa barýy jıilegen. Olardyń kóbi jol kartasyna aqshany salǵanyna áli 15 mınýt ótpegenin jıi aıtady. Bul jaǵdaı olardy jol aqysyn tóleýden bosatpaıdy jáne sapar aldynda kartasyna tólemniń ýaqtyly túsýin qadaǵalaýy tıis. Al, jeńildik kartasy barlar, mysaly zeınetkerler, oqýshylar jol aqysyn tólemeı, kartochkasyz júrýge bolady dep oılaıdy. Sondaı-aq, jastar kóbinese SMS nemese QR terip qoıyp otyra beredi, baqylaýshy kirgende ǵana tóleı salady. Uıaly telefonnyń ekran jaryǵyn basyp, telefonynyń óship qalǵanyn aıtatyndar bar. Tólem skrınshotyn jasap, sony birneshe ret kórsete beretinder de bolady. Biz qazir biz bul aılalardyń barlyǵyn jiktedik jáne árbir baqylaýshy algorıtm boıynsha qalaı tekserý qajet ekenin jaqsy biledi», - dedi Omarhan Abylaıhan óńirlik kommýnıkatsııalar qyzmeti alańynda.
Ol jol aqysyn tólemeý qala mańyna qatynaıtyn marshrýttarda ózekti kúıde qalyp otyrǵanyn aıtty.
«Qazir bul máselede oń dınamıka baıqalady. Eger 4 jyl buryn qalalyq marshrýttarda jol aqysyn tólemeý shamamen 30% bolsa, qala mańyndaǵy marshrýttarda 70%-ǵa deıin jetken. Búgingi kúni jaǵdaı jaqsardy, ıaǵnı bizdiń búgingi esepteýimiz boıynsha qalalyq marshrýttarda jol aqysyn tólemeý shamamen 20% bolyp otyr», - dedi spıker.
