Almatynyń qoǵamdyq kólikterinde jol aqysyn qolma-qol aqshamen tóleý toqtatyldy
ALMATY. QazAqparat- Almatyda 2016 jyldyń 11 qańtarynan bastap, qoǵamdyq kólikterde jol aqysy tek qana «OŃAI» kólik kartasy arqyly tólenedi.
Qolma-qol aqshamen tóleý tolyǵymen kúshin joıdy. Bul týraly búgin «Almaty qalasynyń kólik holdıngi» JShS baspasóz qyzmetinen habarlady.
«Almaty qalasynyń kólik holdıngi» JShS men jolaýshy tasymaldaýshy kompanııalar arasyndaǵy kelisimshartqa sáıkes, «OŃAI» kartasyn tirkeý termınaly isten shyqqan jaǵdaıda qoǵamdyq kóliktiń júrgizýshisi kólikti toqtatýy tıis. 15 mınýt ishinde «OŃAI» kontroleri kelip, óziniń termınaly arqyly jolaýshylarǵa basqa qoǵamdyq kólikke aýysyp otyrýǵa múmkindik beretin bılet úlestiredi. Al jolaýshylar sol arqyly 90 mınýt aralyǵynda osy baǵdardaǵy kelesi qoǵamdyq kólikke otyryp, qosymsha aqsha tólemesten dittegen jerine bara alady.
Osyǵan baılanysty, jolaýshylardan qoǵamdyq kólik júrgizýshisine jáne kondýktoryna jol aqysyn tólemeýlerin suraımyz. Budan bylaı «OŃAI» kartasy joq jolaýshylar bıletsiz júrgen jolaýshy bolyp sanalady. Al jolaýshylardy bıletsiz alyp júrgen qoǵamdyq kólik júgizýshisi jaýapkershilikke tartylady», - delingen habarlamada.
Dálirek aıtsaq, QR Ákimshilik quqyq buzýshylyq kodeksiniń 622-shi babynyń 2-shi tarmaǵyna (Qala jáne qala mańyna qatynaıtyn qoǵamdyq kólikti paıdalaný erejesin buzý) sáıkes, qoǵamdyq kólikte jol aqysyn tóleýden jaltarǵan jolaýshyǵa eki aılyq eseptik kórsetkish (4 242 teńge) kóleminde aıyppul salynady.
Sondaı-aq, QR Ákimshilik quqyq buzýshylyq kodeksiniń 623-shi babynyń 9-shy tarmaǵyna (Jolaýshylarldy bıletsiz alyp júrý) sáıkes, qala jáne qala mańyna qatynaıtyn tramvaı, trolleıbýs jáne baǵdarlyq taksıde jolaýshylardy bıletsiz alyp júrgen júrgizýshige - bes aılyq eseptik kórsetkish (10 605 teńge) kóleminde aıyppul salynady.
2016 jyldyń 18-shi qańtarynan bastap, «Almaty qalasynyń kólik holdıngi» JShS qalalyq ІІD Ákimshilik polıtsııa basqarmasy jáne BAQ ókilderin tarta otyryp, qaladaǵy qoǵamdyq kólikterde bıletsiz júrgen jolaýshylardy anyqtaý maqsatynda arnaıy reıdter uıymdastyrady.
Aıta ketelik, 2016 jyldyń 11 qańtaryna qaraı, qalada barlyǵy 560 827 «OŃAI» kólik kartasy satylǵan jáne berilgen. Olardyń ishinde «OŃAI» jeńildikti kólik kartalarynyń sany - 346 741, al satylǵan Biryńǵaı kólik kartalarynyń sany - 214 086.
2015 jyly «OŃAI» kólik kartasy arqyly 231 231 475 teńgege 3 733 447 ret tranzaktsııa jasalǵan.
Al 2016 jyldyń 1-10 qańtary aralyǵynda (10 kún ishinde) «OŃAI» kólik kartasy arqyly 67 290 240 teńgege 1 179 361 tranzaktsııa jasaldy.
