Almatynyń qoǵamdyq kólikteri de jol erejesin qadaǵalaıtyn bolady
ALMATY. QazAqparat - Almatynyń qoǵamdyq kólikterinde jol erejesin baqylaý kameralaryn ornatý bıyldan bastalýy múmkin.
Bul týraly Almaty qalalyq Jolaýshylar kóligi men avtomobıl joldary basqarmasynyń basshysy Maqsut Isahov málim etti, dep habarlaıdy QazAqparat tilshisi.
Maqsut Isahovtyń aıtýynsha, joba bıyl júzege asa bastaýy yqtımal.
«Bıyl jobany júzege asyra bastaımyz degen úmitimiz bar. «Jolaq» júıesin Astanadaǵy Ǵaryshtyq zertteýler ınstıtýty ázirledi. Júıe boıynsha avtobýstyń aldyńǵy jáne artqy bóligine kameralar ornatylyp, jol erejesiniń buzylýy tirkeletin bolady. Atap aıtqanda, avtobýstarǵa arnalǵan «A» jolaǵyna ótip ketý, ruqsat etilmegen jerlerde jolaýshylardy kólikten túsirý, jolaqta kóligin toqtatý syndy jol erejesiniń buzylýy tirkelip «GLONASS» arqyly avtomatty túrde ІІD-ne joldanatyn bolady. Sodan keıin, polıtseıler sýreti tirkelgen aıyppul qaǵazyn júrgizýshilerge joldaıdy», - dedi Maqsut Isahov.
Onyń aıtýynsha, joba boıynsha qazirgi ýaqytta Іshki ister departamenti qalalyq bıýdjetke ótinish bergen.
«Eger ótinish qanaǵattandyrylsa, onda alǵashqy jarty jyldyqta arnaıy jolaqpen júretin avtobýstar men trolleıbýstarǵa baqylaý kameralary ornatylady», - dedi M.Isahov.
Almatyda bólingen jolaqtardyń arqasynda qoǵamdyq kólikterdiń ortasha jyldamdyǵy 1,5 esege, al jolaýshylar aǵyny 30 %-ǵa artqan.
