Almatynyń qoǵamdyq kólikteri bir jarym aıda 2 mlrd teńge paıda tapty
ALMATY. QazAqparat - Almatyda 1 tamyzdan bastap qoǵamdyq kólikterde saralanǵan tarıf engizilgen bolatyn. «Ońaı» JShS búgin avtoparkterge túsetin 1 mlrd teńgeden astam túsim kóleńkeli aınalymnan shyqqanyn málimdedi, dep habarlaıdy QazAqparat tilshisi.
Almatylyqtar arasynda «OŃAI» kartasyn qoldanýshylar sany 3,5 esege artqan. «Ońaı» JShS-niń málimdeýinshe, saralanǵan tarıf engizilgeli beri bir jarym aı ishinde avtoparkterge 2 mlrd teńgege jýyq túsim túsken.
Qyrkúıektiń 1-i men 12-si aralyǵyndaǵy tranzaktsııalardyń jalpy kólemi 28,2 mln teńge boldy. Bul shilde aıyndaǵy kórsetkishten 139 paıyzǵa (11,8 mln teńgege) joǵary. Osy aıdyń 12 kúninde avtoparkter túsimi 543 mln teńgege jetip, «OŃAI» kartasymen jasalǵan tranzaktsııalar kólemi 9 mıllıonǵa jýyqtaǵan.
«Sońǵy málimetter saralanǵan tarıf engizý sheshiminiń qanshalyqty mańyzdy bolǵanyn dáleldep otyr. Qazir avtoparkterdiń shynaıy qarjylaı aınalymy men jolaýshylar tasymalynyń naqty kólemin kórip otyrmyz. Qala ákimshiligine jiberiletin bul málimetter Almaty qalasynyń qoǵamdyq kólik salasyn damytýǵa septigin tıgizedi», - dedi «Almaty qalasynyń kólik holdıngi» JShS dırektory Sadır Hamraev.
Saralanǵan tarıf engizilgenimen, 80 teńge kólemindegi negizgi jolaqy baǵasy ózgerissiz qalyp, barlyq jeńildikter sol qalpynda saqtaldy.
