Almatynyń kireberisindegi jańa ekologııalyq beket jumysyn bastady
ALMATY. QazAqparat – Almaty mańyndaǵy alǵashqy ekologııalyq beket óz jumysyn bastady. Bir táýlikte elýge jýyq kólik toqtatylyp, olardan shyǵatyn zııandy zattardyń mólsheri ólshendi, dep habarlaıdy QazAqparat tilshisi.
Jańartylǵan ekoposttarda kópkomponentti gazanalızatorlar qoldanylady. Sol arqyly benzın jáne gazben júretin kólikterden shyǵatyn zııandy zattardy ólsheıdi. ıAǵnı, kómirsýtekter, kómirtek totyǵy, kómirqyshqyl gazy, azot oksıdteri tekseriledi. Dızelmen júretin kólikter de nazardan tys qalmaıdy.
«Qulja tas jolyndaǵy ekologııalyq bekettiń jumys istep turǵanyna 10 jyldaı ýaqyt boldy. Osy ýaqyt aralyǵynda ol eskirdi. Sondyqtan ony qaıta qalpyna keltirdik. Gazdardy ólsheýge arnalǵan qondyrǵysy bar jańa modýldik ǵımarat ornatyldy. Jańartylǵan ekopost qarasha aıynan bastap testilik rejımde jumys isteı bastady. Jaqyn arada taǵy osyndaı 17 ekopost paıda bolady. Jer ýchaskesi bólindi. Eki apta saıyn bir ekopost iske qosylady. Byltyr aýa sapasyn baqylaýǵa arnalǵan 10 avtomatty stantsııa ornattyq. Stantsııalar atmosferadaǵy lastaýshy zattardyń kólemin, sondaı-aq ylǵaldylyq, temperatýra, qysym, jel baǵyty men jyldamdyǵyn ólsheıdi», - dedi Almaty qalalyq jasyl ekonomıka basqarmasy bastyǵynyń orynbasary Aıdyn Temeshev.
Ekopostarda kólikterden shyǵatyn zııandy zattardy ólsheýge arnaıy oqytylǵan 60 – tan astam maman jumyldyrylady.
19 ekoposttyń árqaısysy úshin jospar quryldy, oǵan sáıkes kúnine 500-den astam kólik tekserilýi kerek.
«Jańartylǵan ekopost jumysyn keshe bastady. Bir táýlikte 48 kólik toqtatyldy. Onyń ishinde jeti avtokólik ıesine hattama toltyryldy. Ákimshilik aıyppul 434-bap boıynsha salynady. Birinshi ret eskertý retinde 2 AEK aıyppul salynady, eger kólik quraly ekinshi ret toqtatylsa, onda 5 AEK, al eger ol úshinshi ret qaıtalansa, avtokólik ıesi 10 AEK kóleminde aıyppul tóleýi kerek. Sondyqtan, eskertý alǵannan keıin avtokólik ıesi mashınasyn memlekettik standartqa jáne zerthanalyq tekserýden ótkizý qajet», - dep qosty Almaty qalalyq jergilikti polıtsııa qyzmeti bastyǵynyń orynbasary Erjan Uzabaev.
