Almatynyń kireberisinde 19 ekopost jumys isteıdi
ALMATY. QazAqparat- Almaty ákimi Baqytjan Saǵyntaev gazanalızatormen jáne tútin ólsheýishpen jabdyqtalǵan Qulja tas joly boıyndaǵy ekopostyń daıyndyǵyn tekserdi, dep habarlaıdy QazAqparat tilshisi.
Almaty ákimi Baqytjan Saǵyntaev Instagram-daǵy paraqshasynda qalada 19 ekopostyń ornatylatynyn jáne onyń ekeýi jaqyn kúnderi jumystaryn bastaıtynyn aıtty.
«Jumys saparymen Qulja tas jolynda ornatylǵan jańa ekologııalyq beketke bardym. Munda kóp komponentti gaz taldaǵyshtyń kómegimen benzın jáne gazben júretin kólikten shyǵatyn ýly gazdyń quramyndaǵy kómirsýtegi, kómirtegi oksıdi, kómirtegi dıoksıdi, azot oksıdi, ottegi tekseriledi. Dızeldi otynmen júretin kólikterdegi gazdyń tútini de tekseriledi», - dep jazdy B. Saǵyntaev.
Onyń málimentinshe, qalaǵa kire beriste barlyǵy 19 ekopost jumys isteıdi. Jaqynda alǵashqy ekeýi Qulja traktisi men Buqtyrma kóshesinde iske qosylady. Testilik rejımdegi tekserý kezinde tútini normadan asatyn shamamen 5 myń jeńil jáne 1 myńnan astam júk kóligi anyqtaldy.
Jaqynda gaz taldaǵyshy men tútin ólshegishi bar jyljymaly ekopatrýlder iske qosylady.
Sondaı-aq barlyq ekopostarda aýa sapasyn ólshep, onyń deregin onlaın-karta men LED-dıspleıde kórsetetin stansalar ornatylady.
«Bul – qala ekologııasyn saýyqtyryp, atmosferany lastaıtyn avtokólikterdiń úlesin azaıtýǵa baǵyttalǵan», - dep atap ótti B. Saǵyntaev.
Buryn habarlanǵandaı, ekologııalyq kórsetkishterdi baqylaýdyń onlaın kartasy megapolıs turǵyndaryna qorshaǵan ortanyń jaı-kúıi týraly, onyń ishinde atmosferalyq aýanyń sapasy týraly málimetterge keńeıtilgen qol jetimdilikti qamtamasyz etedi.
Joba Almatynyń ekologııalyq jaǵdaıy týraly barlyk qoljetimdi málimetterdi biriktiretin dınamıkalyq platforma. Ár 20 mınýt saıyn onlaın baqylaý stantsııalary aýa jaǵdaıy týraly aqparatty júıege jiberedi. Stantsııalar atmosferadaǵy lastaýshy zattardyń kólemin, sondaı-aq ylǵaldylyq, temperatýra, qysym, jel baǵyty men jyldamdyǵyn ólsheıdi. Belgili bir kezeńdegi ortasha mánder jáne ortasha kúndik belgilengen kólemde ruqsat etilgen kontsentratsııa mánderi kórsetiledi.
Almaty qalasynyń ákimi B. Saǵyntaevtyń tapsyrmasymen júzege asyrylyp jatqan jobanyń maqsaty – qarapaıym azamattarǵa, sarapshylar men mamandarǵa onlaın formattaǵy málimetterdi berý. Sonymen qatar, olardy taldaý negizinde aýa sapasynyń jáne basqa parametrlerdiń ózgerýin boljaýǵa múmkindik beretin málimetter bazasy qurylady.
