Almatynyń qazynashylyq departamenti basshysynyń orynbasaryna qatysty qylmystyq is qozǵaldy
ASTANA. QazAqparat - Almaty qalasynyń Ekonomıkalyq qylmysqa jáne sybaılas jemqorlyqqa qarsy kúres departamenti «Almaty qalasy boıynsha qazynashylyq departamenti» MM basshysynyń orynbasary B. esimdi azamatqa qatysty qylmystyq is qozǵady, dep habarlady qarjy polıtsııasynyń baspasóz qyzmetinen.
Atalǵan is 307 baptyń 2 bólimi boıynsha, ıaǵnı laýazymdyq ókilettigin teris paıdalanýǵa qatysty bolyp otyr.
«Basshynyń orynbasary ózi úshin paıda tabý maqsatynda qyzmettik ókilettigin teris paıdalana otyryp, «Almaty qalasy Qurylys basqarmasy» mekemesiniń qarjylandyrý bóliminiń bastyǵy men býhgalterinen aqysyz túrde qurylys materıaldaryn usynýdy talap etken. 2014 jyldyń 14 sáýirinde ol jalpy quny 659 myń teńgeniń 10 tonna tsementi pen 4 tonna armatýrany alǵan»,-delingen habarlamada.
