Almatynyń qazaq tiline degen qamqorlyǵy joǵary
ALMATY. Qyrkúıektiń 9-y. QazAqparat /Erbol Azanbek/ - 20 jyl buryn Almaty qalasynda qazaqtardyń úlesi 24 paıyz bolsa, qazir qaladaǵy qazaqtardyń sany 50 paıyzdan asyp otyr.
Bul týraly búgin www.almaty.kz saıtynda ótip jatqan ınternet konferentsııa barysynda qaladaǵy qazaq tiliniń ahýalyna qatysty suraqqa jaýap bergen Almaty qalalyq jastar saıasaty basqarasynyń bastyǵy Baqtııar Máken aıtty, dep habarlaıdy QazAqparat.
Jastar saıasaty basqarmasynyń bastyǵy atap ótkendeı, 20 jyl buryn qalada sanaýly ǵana qazaq mektebi bolsa, qazir olardyń sany 50-ge jetti. Búgingi kúni 70 myńdaı bala qazaqsha oqıdy. Salynǵan jańa mektepterdiń barlyǵy qazaq mektebi bolyp ashylyp jatyr. Bul memlekettik tilge qamqorlyqtyń barlyǵyn kórsetedi.
«Búginde jastar arasynda memlekettik tildi nasıhattaý maqsatynda qalalyq ákimdik tarapynan bolsyn, jastar uıymdary tarapynan da aıtarlyqtaı jumystar jasalýda. Almaty qalasy Jastar saıasaty jónindegi basqarmasy ótkizetin is-sharalardyń 90 paıyzy memlekettik tilde júrgiziledi. Qalalyq jastar men jasóspirimder demalys ortalyqtary jetekshileriniń 60 paıyzy ózge ult ókilderi bolsa da, is-qaǵaz aınalymy memlekettik tilde júrgiziledi. Joǵary oqý oryndarymen birlese jastar arasynda memlekettik tildi nasıhattaýǵa baǵyttalǵan aıtarlyqtaı jumystar júrgizilýde. Stýdentter arasynda «Ana tilim - ardaǵym» baıqaýy, «Qazaqstan - bizdiń ortaq úıimiz!» etnofestıvali, ózge ult ókilderiniń memlekettik tildi bilý týraly jarystar ótkizilip turady», dedi B.Máken.
«Degenmen, bul salada áli de sheshilmegen máseleler joq emes. Jyldar boıy qalyptasqan tildik ahýaldy az ýaqyttyń ishinde ózgertý qıyn. Bul oraıda, eldegi naqty jaǵdaıdy barynsha eskerýimiz qajet. Bizge, eń aldymen, eldiń berekesi, yntymaǵy men birligi qajet. Til saıasaty - tatýlyqtyń quraly bolýy tıis, dep atap ótti qalalyq jastar saıasaty basqarmasynyń bastyǵy.
