Almatynyń «Qaıraty» ÝEFA Kýbogynda alǵashqy kezdesýin Portýgalııanyń «Sportıng» klýbymen ótkizedi

Bul jaıynda atalǵan Kýboktyń fınalyna joldama alǵan tórt komandanyń jattyqtyrýshylary arnaıy baspasóz máslıhatyn ótkizý barysynda aıtty.

Esterińizge sala ketsek, sáýirdiń 29-y men mamyrdyń 1-i aralyǵynda Almatyda shaǵyn fýtboldan ÝEFA Kýbogynyń aqtyq básekesi ótedi. Oǵan «Qaırat», «Sportıng», «Benfıka» jáne «Montesılvano» klýbtary qatysady.

«Alǵashqy kezdesýdi «Qaırat» klýbymen ótkizemiz. Ázirge qatysýshy klýbtardyń qaısysynyń pármendiligi basym dep aıtý erte, degenmen alǵashqy kezdesý, oıynnyń ary qaraı qalaı órbıtindigin kórsetedi», -deıdi «Sportıng» klýbynyń jattyqtyrýshysy Orlandý Dýarte.

«Ótkeli otyrǵan bul jarys Qazaqstan úshin óte mańyzdy shara. Jarysqa qatysýshy tórt komanda da úzdik shyǵý úshin baryn salatyny belgili. Osy Kýbokqa daıyndyq barysynda kóptegen eýropalyq komandalarmen joldastyq kezdesýler ótkizip, óz sheberligimizdi shyńdaı tústik. Degenimen, oıynǵa kelgen jankúıerlerdiń qoldaýy jarysta jeńiske jetýge úlken kómek bolar edi», -deıdi «Qaırat» klýbynyń jattyqtyrýshysy Joao Barboza.

Sonymen, 29-shy sáýir kúni Balýan Sholaq atyndaǵy sport kesheninde astana ýaqytymen saǵat 18:30-da «Qaırat» jáne «Sportıng» komandalary arasynda kezdesý ótse, 21:00-de «Benfıka» men «Montesılvano» klýbtary óz ónerlerin kórsetedi. Mamyrdyń 1-i kúni saǵat 15:00-de úshinshi oryn úshin kezdesý ótse, saǵat 17:30-da fınaldyq báseke bolady.

Qazirgi ýaqytta atalǵan Kýbokqa talasýshy klýbtardyń sportshylary Almatyǵa túgeldeı kelip, oıyn aldyndaǵy jattyǵýlaryn júrgizýde.