Almatynyń «Qaırat» komandasy «Inter» jáne «Darmshtad 98» fýtbol klýbtarymen joldastyq kezdesýler ótkizedi
ALMATY. QazAqparat- Qazaqstannyń Premer Lıgasynda óner kórsetetin Almatynyń «Qaırat» fýtbol komandasy jańa maýsym aldynda Túrkııada ótkizetin oqý-jattyǵý jıyny barysynda eki joldastyq kezdesý ótkizedi. Bul týraly «Qaırat» fýtbol klýbynyń resmı saıtynda jarııa etildi.
14 qańtar kúni «qaırattyqtar» Ázirbaıjannyń «Inter» klýbymen kezdesedi. 2014-2015 maýsymynda bakýlik komanda el chempıonatynyń týrnırlik kestesinde ekinshi orynda keledi. Al 17 qańtar kúni almatylyq komanda Germanııanyń ekinshi Býndeslıgasynyń komandasy «Darmshtad 98» fýtbol klýbymen baq synasady. Qazirgi tańda Dırk Shýsterdiń shákirtteri 33 upaımen el chempıonatynda úshinshi orynda keledi.
«Qaırat» komandasynyń Antalıa qalasynda ótkizetin oqý-jattyǵý jıyny 7 qańtardan 19 qańtarǵa deıin jalǵasady.
Aıta ketelik, Vladımır Vaısstyń shákirtteri ótken jylǵy maýsymda el birinshiliginiń qola júldesin jáne Qazaqstan Kýbogyn jeńip alǵan bolatyn.
