Almatynyń qaı ózen-kólderine shomylýǵa ruqsat bar
Almaty qalalyq Tótenshe jaǵdaılar departamenti azamattyq qorǵanys basqarmasynyń basshysy Ishar Savazovtyń aıtýynsha, Almaty aýmaǵynda shomylýǵa ruqsat etilgen 4 oryn belgilendi.
«Olar – Saıran kóli (Almaty aýdany jaǵynda, Tóle bı kóshesinen 200 metr jerde); Saıran kóliniń batys jaǵy (Áýezov aýdany jaǵynda, Tóle bı kóshesine qarama-qarsy 300 metr jerde); «Baým baǵy» mańyndaǵy D. Qonaev atyndaǵy úlken Almaty kanalynyń boıy; Gúlder demalys aımaǵy. Osy 4 sý qoımasynan basqa Esentaı, Kishi Almaty ózenderi sııaqty taý ózenderinde sýǵa túsýge tyıym salynady», - dedi Ishar Savazov.
Sonymen qatar ol sýda bolatyn tótenshe jaǵdaılardyń aldyn alý úshin birqatar qaýipsizdik erejesin saqtaýdy surady. Ruqsat etilmegen jerge shomylýǵa, júze bilmeıtin adamǵa sýǵa túsýge, jaǵalaýdan alysqa ketýge, balalardy eresekterdiń qaraýynsyz qaldyrýǵa, túnde ári mas kúıinde sýǵa túsýge tyıym salynady.
«5 adamnan turatyn qutqarý qyzmeti jaǵalaýlarda táýlik boıy kezekshilik etedi. Olar qajetti qural-jabdyqtarmen qamtamasyz etilgen. Reıd sharalary sýǵa túsýge ruqsat etilgen jerlerde ǵana emes, tyıym salynǵan jerlerde de ótkizilýde. Drondar halyqty aqparattandyrý úshin de qoldanylady», - deıdi spıker.
Aıta keteıik, ruqsat etilmegen jerlerde sýǵa túskender ákimshilik jaýapqa tartylyp, aıyppul tóleıdi.