Almatynyń qaı ózen-kólderinde shomylýǵa bolady
Almaty qalasy tótenshe jaǵdaılar departamenti bastyǵynyń orynbasary Erlan Álibekovtyń aıtýynsha, qala aýmaǵynan 28 shaǵyn ózen aǵyp ótedi, sonymen qatar qala ishinde 26 sý qoımasy bar.
Megapolıste shomylýǵa ruqsat etilgen 4 oryn belgilendi.
Olar:
1. D. Qonaev atyndaǵy Úlken Almaty kanaly – Baým toǵaıy;
2. D. Qonaev atyndaǵy Úlken Almaty kanaly – Gúlder demalys aımaǵy;
3. Saıran kóli – Tóle bı kóshesinen ońtústik baǵytta 300 metr;
4. Saıran kóli – Tóle bı kóshesinen pırske deıin ońtústik baǵytta 300 metr.
Onlaın brıfıng barysynda Erlan Álibekov «jabaıy» jaǵajaılarda shomylý keleńsiz jaǵdaılarǵa ákelýi múmkin ekenin eskertti.
Sonymen qatar, ol ata-analardan jazǵy demalys kezinde balalardyń qaýipsizdigine nazar aýdarýdy surady.
«Bıyl bir adam sýǵa ketti. Tájirıbe men baqylaý nátıjesi kórsetkendeı, qaıǵyly oqıǵalar adamdardyń tıisti tártip erejelerin buzýynan oryn alýda. Ótken jyly júrgizilgen profılaktıkalyq is-sharalardyń arqasynda sýda adam ólimi tirkelgen joq, alaıda Saıran kólinde qutqarýshylar 4 adamdy qutqardy», - deıdi Erlan Álibekov.
Bıyl Tótenshe jaǵdaılar departamentiniń qyzmetkerleri aýdan ákimdikterimen birlesip shomylýǵa tyıym salynǵan jerlerde 58 belgi ornatty.
Al Saıran kólinde «Sýdaǵy qaýipsizdik sharalary men erejeleri týraly» bılbord ornalastyryldy.
Departament ókili bıylǵy jazda Almaty sý aıdyndarynda qutqarýshylar, sýda qutqarý otrıadynyń jáne polıtsııa qyzmetkerleriniń, QR Ulttyq ulanynyń № 5571 «Ońtústik» bóliminiń áskerı qyzmetshileri kún saıyn kezekshilik etetinin málim etti.
«Demalys kúnderi bul jumys kúsheıtilgen rejımde ótedi. Tártip buzýshylar ákimshilik jaýapkershilikke tartylady. Mysaly, ótken jyly belgilenbegen oryndarda shomylǵany úshin 6 adamǵa aıyppul salyndy. Sondyqtan ruqsat etilgen jerlerde ǵana shomylyńyz, jaǵalaýdan jáne qorshaý belgilerinen alys júzbeńiz. Eger siz ruqsat etilgen jerde shomylsańyz, belden joǵary sýǵa kirmeńiz. Balalardy qaraýsyz qaldyrmańyz. Qaıyqtardan, kópirlerden jáne aılaqtardan sýǵa sekirmeńiz. Túngi ýaqytta jáne mas kúıde shomylmańyzdar», - deıdi Almaty TJD basshysynyń orynbasary.
Eske salaıyq, qutqarý qyzmetiniń biryńǵaı telefony – 112.