Almatynyń qaı kóshelerinde jol apaty jıi bolady
ALMATY. QazAqparat - Jol-kólik apaty boıynsha Almaty qalasy ózge óńirlermen salystyrǵanda «kósh bastap» keledi. «QazAqparat» tilshisi Bas prokýratýranyń Quqyqtyq statıstıka komıteti ázirlegen málimettirdi negizge ala otyryp, Almatynyń qaı aýdanynda, qaı kóshe qıylystarynda barynsha muqııat bolý qajettigin anyqtady.
Almatyda jyl basynan beri 2 497 jol apaty tirkeldi, bul 10 myń adamǵa shaqqanda 32 oqıǵadan keledi. Bul - Qazaqstan boıynsha eń úlken kórsetkish.
Atalǵan komıtet málimetterine súıensek, jol apaty kóbine Almaly aýdanynda bolady. Onda jyl basynan beri 410 jol apaty bolsa, kelesi qaýipti aýdan Alataý aýdany, onda 374 apat, Jetisý aýdanynda - 345, Áýezov aýdanynda - 341 jol apaty bolǵan. Medeý aýdany qaýipsiz aýdan retinde baǵalanyp otyr, onda jyl basynan beri 250 apat bolǵan.
Kólik apaty jıi bolatyn jol qıylystary Áýezov, Bostandyq, Alataý, Medeý aýdandarynda ornalasqan. Komıtettiń ınteraktıvti kartasyndaǵy aqparatqa súıensek, bıyl eń kóp jol apaty Tastaq mańynda, Tóle bı - Túrkebaeva - Turǵyt Ozal kóshelerinde bolǵan. Jyl basynan beri onda 26 apat tirkelgen. Kelesi apatty qıylys - Abaı men Altynsarın kósheleri. Onda jyl basynan beri 21 oqıǵa tirkelse, Fýrmanov-Raıymbek-Pýshkın kósheleriniń qıylysynda - 20, Abaı men Saın kósheleriniń qıylysynda 16, Jandosov-Satpaev-Manas úsh buryshynda 12 oqıǵa, Bekmahanov pen Soltústik aınalma jolda 12 kólik apaty tirkelgen.
Almaty polıtseıleri jol-kólik apatynyń aldyn alý jumystary jaqsy nátıje berip jatqanyn, ásirese balalardyń jol apatynan zardap shegýi azaıǵanyn aıtty.
«Jaıaý ótkelder, aınalma joldar jaraqattaný kórsetkishin tómendetti. Sondaı-aq, ІІD men Densaýlyq saqtaý basqarmasynyń birlesken jumystary nátıjesin bere bastady. Bıylǵy jyldyń alǵashqy 4 aıynda balalar zardap shekken jol apaty 245 ret tirkelse, byltyr sáıkes kezeńde 320 ret bolǵan», - deıdi ІІD resmı ókili Saltanat Ázirbek.
