Almatynyń qaı aýdanynda eń aýqatty adamdar turady
ALMATY. QazAqparat - Almatyda ótip jatqan 5-ınvestıtsıalyq forým barysynda qala ákiminiń orynbasary qaı aýdannyń turǵyndary kóp jalaqy alatynyn aıtty.
Sheneýnik taýar men qyzmet baǵanyń ósýi jáne tabys týraly baıandady.
«Almatylyqtardyń satyp alý múmkindigi joǵary. Qalada Medeý, Bostandyq, Almaly aýdandarynyń turǵyndary eń kóp tabys tabady. Bul aýdandar qarjylyq, ekonomıkalyq ortalyq sanalady. Munda halyq orta eseppen 250-270 myń teńge alady. Túrksib, Jetisý aýdandarynda orta eseppen 150-170 myń teńge tóleıdi. Sebebi, onda óndiris oryndary kóbirek. Sondyqtan, qala turǵyndarynyń satyp alý qabileti ártúrli. Respýblıka boıynsha almatylyqtardyń satyp alý múmkindigi joǵary», - dedi A.Mádıev.
Sondaı-aq, memlekettik qyzmetker atalǵan aýdandardaǵy taýar baǵasynyń qymbattyǵyn tilge tıek etti.
«Biz baǵany baqylap otyramyz. Taýar baǵasynyń ústinen 35-40%-y saýdagerdiń tabatyn tabysy. Munda jol shyǵyny da kiredi. Taýar baǵasy naryq zańdarymen qalyptasady. Baǵany erkine jiberse, janarmaımen baılanysty jaǵdaı sııaqty ýshyǵyp ketýi múmkin. Biz naryqqa aralaspaımyz, munyń bárin naryq ózi retteıdi. Ákimdik tek baqylap otyrady. Keı jerde alypsatarlyqtyń belgisi baıqalsa ǵana aralasamyz», - dedi Almas Mádıev.
