Almatynyń qaı aýdandarynda gaz óshiriledi

ALMATY. QazAqparat - Almaty ákimdigi qala turǵyndaryna «kógildir» otyn berýdi shekteý merzimin naqtylady, dep habarlaıdy QazAqparat tilshisi.

Qalanyń Alataý jáne Naýryzbaı aýdandarynda ornalasqan eki sektordyń turǵyndaryna tabıǵı gaz berýdi shekteý merzimi 1,5 táýlikten aspaıdy. 22 qazan kúni saǵat 00.00-de Naýryzbaı aýdanynyń aýmaǵynda ornalasqan Sádýaqasov-Pıonerskaıa-Aıbergenov kósheleri-Raıymbek batyr dańǵylynda  («Altyn Besik», «Dostyq», «Qalqaman-1», «Qalqaman-2», «Shuǵyla» shaǵynaýdandary) 4 myńǵa jýyq jekemenshik turǵyn úı men 4 kópqabatty úı gazdan ajyratylady.

23 qazannan bastap Alataý aýdanyndaǵy Momyshuly-Caın-BAK-Soltústik sheńber-Rysqulov kóshelerinde (Aıgerim-1», «Aqbulaq», «Zarıa Vostoka», «Kók Qaınar», «Qurylysshy-1» jáne «Qurylysshy-2», «Túrkistan», «Shańyraq-1» jáne «Shańyraq-2») shamamen 8 myń úı 1,5 táýlikke gazdan ajyratylady.

Naýryzbaı aýdanynyń turǵyndaryn gazben jabdyqtaý jumystary 23 qazanda, al Alataý aýdanynda - 24 qazanda júrgiziledi. «QazTransGaz-Aımaqtyń» atap ótýinshe, gazben jabdyqtaý boıynsha shekteý engizý merzimderi meteorologııalyq boljamdarǵa sáıkes túzetilgen. Jaýapty kásiporyn atalǵan qalalyq sektor turǵyndarynan ýaqytsha qolaısyzdyqqa túsinistikpen qaraýdy suraıdy.