Almatynyń qandaı bazarlary jóndeýden ótedi
ALMATY. QazAqparat - Almatyda Áýezov aýdanynda kelesi jyly «Sary Arqa» jáne «Arystan» bazarlaryn qaıta jańǵyrtý bastalady, dep habarlaıdy QazAqparat tilshisi.
«Kelesi jyly «Saryarqa» jáne «Arystan» bazarlaryn jańǵyrtý bastalady. Olardyń ornynda jer asty parkıngi bar, jaıly zamanaýı saýda ortalyqtary paıda bolady. Osylaısha, aýdanda Prezıdenttiń bızneske qolaıly jaǵdaı jasaý jónindegi bastamasy jalǵasyn tabady», - dedi óńirlik kommýnıkatsııalar qyzmetinde ótken brıfıngte Áýezov aýdanynyń ákimi Ánýar Óskenbaev.
Ákimniń aıtýynsha, aýdanda 5 bazar bar, onyń bireýi «Aqsaı 3» bazary qaıta jańǵyrtylyp, onyń ornynda zamanaýı saýda úıi turǵyzyldy.
«Arystan» bazaryna sáýlettik josparlaý tapsyrmasy berildi. Maquldanǵan eskızdik jobasy da daıyn. Jańǵyrtý 2019 jyldyń ekinshi toqsanynyna josparlanýda. Biz eskızderdi qazir qalamen kelisetin bolamyz, bul barlyq standarttarǵa saı keletin zamanaýı saýda úıi bolady. "Saryarqa" bazaryna keler bolsaq, eskızdik jobany kórdik, 2019 jyldyń úshinshi toqsanynda 2020 jyldyń basynda aıaqtalýy múmkin. «Sary Arqa» bazarynyń Altynsarın kóshesine qaraıtyn bóliginde kelesi jyly jóndeý jumystaryn bastaıdy», - dedi aýdan ákimi.
Sonymen qatar, jyl basynan beri aýdanda "OBI" nemis brendiniń gıpermarketi sııaqty jańa bıznes nysandary iske qosylyp, 6,3 mlrd.teńge ınvestıtsııa salynyp, 240 jańa jumys orny ashyldy.
Esterińizge sala keteıik, buǵan deıin Almaty ákimdigi 2020 jylǵa qaraı qalanyń barlyq bazarlary qazirgi zamanǵa saı bolýy tıis dep málimdegen bolatyn.
