Almatynyń Qala qurylysy keńesi tórt iri nysan qurylysyn bekitti
ALMATY. Sáýirdiń 30-y. QazAqparat /Erlik Erjanuly/ - Biz qalamyz ben bolashaq urpaqtyń ósip-órkendeýi úshin barlyq jaǵdaıdy jasaýǵa tıispiz, dedi Almaty qalasynyń ákimi Ahmetjan Esimov búgin Qala qurylysy keńesiniń májilisinde,
dep habarlaıdy QazAqparat.
Onda bolashaqta salynatyn tórt iri nysannyń jobasy qaralyp, bekitildi. Olar: «Kóktóbe» taýly aımaǵyndaǵy kólik turaǵy men onyń aınalasyn túbegeıli jóndeý jobasy. Saıyn men Jubanov kósheleriniń boıyna jol aıryǵyn salý jobasy. Abaı-Radostovets-Myńbaev-Rozybakıev kósheleriniń toǵysqan jerine salynatyn irisaýda - saýyq nysanynyń jobasy. Qonaev atyndaǵy arnanyń soltústigi men Soltústik aınalma jolynyń batys aımaǵyna astynda iri avtokólik turaǵy bar iri saýda keshenin salý jobasy. Alǵashqy eki jobaǵa tapsyrys berýshiler - Sáýlet jáne qala qurylysy, Jolaýshylar kóligi men avtomobıl joldary basqarmalary.
Ahmetjan Esimovtiń aıtýynsha, jańadan salynatyn bul qurylys nysandary qala turǵyndaryna ǵana emes meımandarǵa da paıdaly bolýy tıis. «Kóktóbeniń» arhıtektýralyq-josparly sheshiminde aımaqtyq jáne vızýaldy, mádenı-saýyqtyq, etnografııalyq, tehnologııalyq, sporttyq aýmaǵy eskerilýi qajet. Bul jobany jasaýshylar Respýblıka saraıy men «Kóktóbe» aýmaǵynyń keshendi damýyn basshylyqqa alýy kerek. Munda avtokólik turaǵy, gondoldi jol, qalamen baılanys qamtylyp, aýmaqtyń landshafty basty nazarda bolǵany jón. Ásem aımaqtyń kelbetin ketiretin jekemenshik qurylystar alynyp tastalýy tıis. Osyndaı naqtyly joba iske asqan kezde bul aımaq qalamyzdyń basty týrıstik ortalyǵy men maqtanyp kórsetetin kózaıymyna aınalatyn bolady.
