Almatynyń iri saýda ortalyqtarynda jaldaý aqysy arzandady
«Elde tótenshe jaǵdaı rejımi engizilgen ýaqytta qyzmet kórsetý salasy - qoǵamdyq tamaqtaný, fıtnes jáne sport, saýda oryndary aıtarlyqtaı shyǵynǵa ushyrady. Bıznes úshin ǵımarat jaldaǵan 9 myńǵa jýyq (24,7%) kásipker qıyndyqqa tap bolady. Qazir jalǵa berýshilermen jeńildik sharttaryn usyný máselesi talqylanyp jatyr»,– dedi shahar basshysy.
Ákimniń aıtýynsha, karantın kezinde ǵımarat ıeleriniń basym bóligi kásipkerlerge qoldaý kórsetip, jaldaý aqysyn alǵan joq.
«Tótenshe jaǵdaı men karantın kezinde iri saýda nysandarynyń ıeleri, onyń ishinde 153 oıyn-saýyq ortalyǵy, saýda ortalyqtary, saýda úıleri men bazarlar 40 myńǵa jýyq jalǵa alýshydan jaldaý aqysyn alýdy toqtatty. Sonymen qatar, qazirgi ýaqytta kóptegen bazarlar men saýda jáne oıyn-saýyq ortalyqtary jalǵa berý qunyn 20-30% tómendetken», - dedi Baqytjan Saǵyntaev.
Almaty qalalyq «Atameken» kásipkerler palatasynyń kómegimen 2,7 mlrd teńgege 13 myńǵa jýyq saýda obektisin jalǵa alýshylardyń problemasy sheshildi. Bul baǵyttaǵy jumystar jalǵasyp jatyr.
Mysaly, «Moskva metropolitan» saýda ortalyǵynyń saýda alańdarynda 180 jalǵa alýshy bar, olardan aı saıyn 265 mln teńge tólem túsedi. Qomaqty shyǵynǵa ushyraǵanyna qaramastan, jalǵa berýshi daǵdarysqa qarsy jeke sharalardy qabyldaı otyryp, jalǵa alýshylardy tólemderden bosatty.
«Avtosıtı» saýda úıinde 120 jalǵa alýshy bar, olardan aı saıyn 6 mln teńge túsedi. Saýda úıi de jalǵa alýshylarǵa qoldaý kórsetýge jáne tótenshe jaǵdaı men karantın kezinde olarǵa demalys berýge daıyn.
Qala ákimi nesıe tólemin shegerýge qatysty aıta kelip, ekinshi deńgeıli bank basshylarynyń tólemderdi shegerý máselesi talqylanatyn Іskerlik keńesiniń quramyna engenin habarlady. Búgingi kúni 127,3 mlrd teńgeniń 360 myń nesıesi boıynsha tólem shegerildi.
Sonymen qatar, bıznesti qoldaý men damytý jónindegi memlekettik jáne óńirlik baǵdarlamalar aıasynda syıaqy mólsheri tómendetildi. Mysaly, «Bıznestiń jol kartasy-2020» baǵdarlamasy boıynsha kásipkerler úshin mólsherleme 6%-ǵa deıin (burynǵysy 8,4%), «Almaty Business-2025» baǵdarlamasy aıasynda 7%-dan 6%-ǵa deıin azaıdy.
«Damý» qorymen birge shaǵyn jáne orta bıznes endi qarqyn ala bastaǵan Alataý, Naýryzbaı, Jetisý, Túrksib jáne Áýezov aýdandarynda syıaqynyń jyldyq mólsherlemesin 7%-dan 5%-ǵa deıin tómendetý boıynsha jumystar júrip jatyr.
