Almatynyń irgesinde medıtsınalyq qaldyqtar shashylyp jatyr
ALMATY. QazAqparat – Almaty mańaıynda shashylyp jatqan shprıtster men dári ampýlalary kópshilikti shoshytty, dep habarlaıdy QazAqparat tilshisi.
«Ekopatrýl» qozǵalysynyń kezekshi pýltine jabaıy polıgon týraly jergilikti turǵyndar habarlasqan.
Alataý aýdanyndaǵy JEO-2 jaqyn ornalasqan polıgondy tekserýge aýdan ákimi, Ekologııa departamentiniń qyzmetkerleri, qoǵam belsendileri, Ekologııalyq polıtsııa mamandary kelgen.
Tekserý barysynda bul jerde shala janǵan shprıtster men ampýlalar saqtalyp turǵany anyqtaldy.
«Bul quqyqbuzýshylyq boıynsha QR QK 338-baby men 328-babyna sáıkes topyraq pen sýdy lastaǵany úshin qylmystyq jaýapkershilik qarastyrylǵan. Bul zattardyń barlyǵy zararsyzdandyrýdan soń jerasty sýlaryna qosylatynyn anyq», - dedi «Ekopatrýl» qozǵalysynyń jetekshisi Tımýr Eleýsizov.
Mamannyń aıtýynsha, bular jaı qaldyqtardan anaǵurlym qaýipti.
«Bulardy joıý úshin arnaıy pesh bolýy tıis. Peshtiń qyzýy 1000 gradýsqa deıin jetýi kerek. Mundaı polıgondar tolyǵymen oqshaý bolýy kerek. Biz kórip turǵanymyzdaı, bul jerde zattar tolyq órtelmegen. Jartylaı janǵan. Qan quıylǵan ampýlalar da shashylyp jatyr. Eger bulardy jabaıy ańdar, ıtter ıiskese, adam balasyna da qaýip tóndiredi. Sanıtarlyq normaǵa sáıkes mundaı oryndardan radıýsy 300 metr qashyqta eshbir kásiporyn, turǵyn úı bolmaýy kerek. Al myna jerde 10 metrden soń túrli óndirister ornalasqan. Adamdar jumys isteıdi. Sonymen qatar, beton eden men beton ǵımarat bolýy kerek. Bul jerde eshbir normanyń saqtalmaǵanyn kórip turmyz», - dedi Tımýr Eleýsizov.
Ekolog mamandar mundaı qaldyqtardyń aınalada qansha jatqanyn anyqtaý múmkin emestigin aıtady.
«Qazir bul qaldyqtardy joıý talaptarynyń buzylǵanyn kórip turmyz. Tek 70 paıyzy ǵana órtelse, qalǵany bir jerge jınalǵan. Al bul qaldyqtar 100 paıyz joıylýy tıis. Kásiporyn quryltaıshysy men dırektory aýdan ákimdigine shaqyryldy. Olardyń ruqsat berý qujaty tekseriletin bolady. Eger arnaıy ruqsat qujaty joq bolsa, zańǵa sáıkes jazaǵa tartatyn bolamyz», - dedi Alataý aýdanynyń ákimi Azamat Qaldybekov.
Reıdke shyqqan mamandar sanıtarlyq talaptardy óreskel buzǵan kompanııaǵa qalaısha quzyrly organdar lıtsenzııa bergenin anyqtaýdy qolǵa aldy.
