Almatynyń ınteraktıvti dinı kartasy azamattardy adasýdan saqtaıdy - dintanýshy
«Álbette radıkaldy jáne ekstremıstik, dinı aǵymdardyń sonymen qatar dinı kýltterdiń taralýy qoǵamymyzǵa úlken zardabyn tıgizedi. Nege deseńiz, baqylaýsyz óz betimen ketken aǵymdar qaı jaqqa aparatyny belgili. Din isteri basqarmasy men «Saraptama jáne zertteý» ortalyǵynyń birikken jobasy ınteraktıvti karta osyndaı aǵymdardyń yqpalynan adamdardy qutqarýǵa septigin tıgizedi. Sebebi resýrs ashyq, kez-kelgen qoldanýshy kire alady. Qandaı konfessııa qandaı qujatpen jumys jasap jatyr. Barlyq aqparat aıqyn», - dedi ortalyqtyń bas sarapshysy Qýmashev Ashat.
Joba avtorlarynyń biri «Saraptama jáne zertteý ortalyǵynyń» jetekshisi Beıbit Turabaevtyń aıtýynsha, karta konfessııaaralyq qatynastardan shyǵyp otyrǵan qatelikterdiń ornyn toltyrýǵa múmkindik beredi.
«Saıt arqyly biz azamattardy dinı uıymdar týraly aqparatpen qamtamasyz etetin bolamyz. Monıtorıng protsesin ońtaılandyrýǵa bolady. Bul óz kezeginde 178 dinı uıym týraly aqparat shoǵyrlanǵan málimetter bazasy bolmaq. Mundaı biregeı jobanyń TMD aımaǵynda balamasy joq. Adamdar arnaıy habarlama qaldyryp, destrýktıvti uıymdar týraly málimet qaldyra alady», - dedi Beıbit Turabaev.
Joba eki tilde - qazaq jáne orys tilderinde, barlyq gadjet túrlerine beıimdelgen arnaıy elektrondyq portal túrinde shyǵaryldy.
Saıttyń basty betindegi «Interaktıvti kartada» qaladaǵy barlyq dinı uıymdarǵa, dinı-ǵuryptyq ǵımarattarǵa, dinı ádebıetter taratatyn nysandarǵa tolyq sıpattama berilgen. Karta jańa qosylǵan málimettermen únemi tolyqtyrylyp, jańartylyp otyrady.
Sonymen qatar, dinı ádebıet saýdasynyń ruqsat etilgen oryndarynyń tizimi kórsetilgen.
Sarapshylardyń aıtýynsha, dinı ekstremızm ıdeologııasynyń taralýyna kóptegen sebepter men faktorlar bar.
Olardyń qatarynda jergilikti halyqtyń dinı saýattylyǵynyń tómendigin, jergilikti turǵyndardyń qala (memleketter) terrıtorııasynda áreket etip júrgen dinı uıymdardyń qyzmetteri jaıly habarsyzdyǵyn, ǵalamtordaǵy destrýktıvti aǵym músheleriniń belsendi áreketin atap ótýge bolady.
Búgingi kúni ártúrli radıkaldy jáne ekstremıstik dinı aǵymdardyń, sonymen qatar destrýktıvti dinı ǵuryptardyń taralýy, qoǵamnyń beıbit damýyna jáne turaqtylyǵyna tónip turǵan eń úlken qaýipterdiń biri bolyp otyr.
Ásirese, qoǵamda dinge degen qyzyǵýshylyqtyń ósýine baılanysty bul ózekti máselege aınaldy. Almatynyń ınteraktıvti dinı kartasy osy máseleni sheshýge arnalǵan. Búginde resýrsty óńdeý jáne toltyrý jumystary tolyǵymen aıaqtaldy.
Karta qala turǵyndaryn zańdy túrde qyzmet etip jatqan dinı uıymdar, dinı-ǵuryptyq ǵımarattar jáne mıssıonerler týraly habardar etip otyrady. Sonymen qatar, baqylaý protsesin edáýir tıimdi etip, júrgizilip otyrǵan jumystyń jyldamdyǵy men nátıjeliligin arttyrýǵa kómegin tıgizetin qala turǵyndaryna da qatysýǵa múmkindik beredi.
