Almatynyń Indýstrıaldy aımaǵynda tórt óndiristik park iske qosylady
ALMATY. QazAqparat – «Indýstrıaldy aımaq - Almaty» JShS dırektory Berikbol Mándibaev onlaın brıfıngte qaladaǵy shaǵyn óndiristik parkterdi damytý jobasy týraly aıtyp berdi, dep habarlaıdy QazAqparat tilshisi.
«2021 jyly jáne odan keıingi jyldary 5,5 myńnan astam jumys ornyn qurýǵa múmkindik beretin, quny 160 mlrd teńge turatyn 38 jobany iske qosý josparlanyp otyr»,– deıdi Berikbol Mándibaev.
Budan bólek, 2020 jyldyń sońyna deıin Almatynyń Indýstrıaldy aımaǵynda tórt shaǵyn óndiris parki iske qosylady. Qazirgi ýaqytta qurylys kompanııalary («KazStroyTrade» JShS, «D&J «Industries & Logistic» JShS, «Ala Estate» JShS, «ADS Industries» JShS) jobalyq jumystardy aıaqtap qaldy.
Óndiris ǵımarattarynyń jalpy aýmaǵy 36 myń sharshy metr. Olarǵa qurylys, jıhaz, jeńil jáne taǵam ónerkásibi salasyndaǵy óndiris oryndary ornalastyrylady. Óndiristik parkterde bir myńnan astam jańa jumys ornyn ashý josparlanǵan.
«Shaǵyn óndiris parkterin damytý jobasy «Almaty bıznes – 2025» shaǵyn jáne orta kásipkerlikti damytý baǵdarlamasy boıynsha júzege asyrylýda. Onyń aıasynda qala aýmaǵynda óndiris ǵımarattaryn ınvestorlar men óndiris bazalarynyń menshik ıeleri salady. Óndiris ǵımarattary shaǵyn jáne orta bıznes sýbektilerine jeńildetilgen sharttarmen: 5-7 jylǵa deıingi merzimge devalvatsııalyq qaýipke qaramastan beriledi. Ǵımaratty jalǵa alý quny sharshy metr úshin 1000-1200 teńgeni quraıdy. Ǵımaratty satyp alý quny sharshy metr úshin 145 000 teńge. Almaty qalasynyń aýmaǵyndaǵy Indýstrıaldy aımaqta shaǵyn óndiris parkin salý isine qatysýǵa 70-ten astam kompanııa qyzyǵýshylyq bildirdi»,– deıdi «Indýstrıaldy aımaq - Almaty» JShS dırektory Berikbol Mándibaev.
