Almatynyń Indýstrıaldy aımaǵynda 200 ga jer ınvestorlarǵa berildi
Bul týraly «Almaty qalasynyń Indýstrıaldy aımaǵy» JShS (IA) dırektory Ádil Bórlibaev aıtty, dep habarlaıdy QazAqparat tilshisi.
«IA aýmaǵynda ónerkásip óndirisin ornalastyrý úshin 275,6 gektar jer berý kózdelgen. Qazirgi ýaqytta ınvestıtsııalyq jobalardy iske asyrý úshin kásipkerlik sýbektilerine ýaqytsha paıdalanýǵa 204,2 gektar jer berildi», - dedi Á.Bórlibaev.
Onyń aıtýynsha, jer telimderine ıelik etý túrli jaǵdaıda sheshilýi múmkin. Búgingi kúni, óndiris qurylysy ýaqytynda jerdi 3 jylǵa deıingi merzimge ýaqytsha óteýsiz paıdalaný (jylyna sharshy metri úshin 42 teńge baǵasymen jalǵa alý) quqyǵy beriledi. IA aýmaǵynda jer telimderin paıdalaný quqyǵyn Óńirlik úılestirý keńesi men qalalyq jer komıssııasy sheshimderiniń negizinde Almaty qalasynyń jergilikti atqarýshy organdary beredi.
«Investıtsııalyq jobany iske asyrýdy jáne ónerkásip nysanyn paıdalanýǵa engizýdi aıaqtaý kezinde kásipker jerdi ári qaraı da jalǵa alýdy, ne ony jekemenshikke satyp alýdy ózi tańdaı alady», - delingen Almaty qalasy Kásipkerlik jáne ındýstrıaldy-ınnovatsııalyq damý basqarmasy habarlamasynda.
«Budan basqa, eger joba aýqymdy bolsa, Qazaqstan Respýblıkasy Investıtsııalar jáne damý mınıstrliginiń Investıtsııalar komıtetimen kelisimshart jasasý múmkindigi bar, ol boıynsha jer telimi kásipkerge zattaı grant retinde, ıaǵnı tegin berilýi múmkin», - dedi Á.Bórlibaev.
Almaty qalasynyń Alataý aýdanyndaǵy IA aýmaǵynda 490 gektar jer bar. Onyń 156,1 gektary - ınfraqurylym qurylystaryna (avtomobıl joldary, temirjol stansysy, kóliktik-logıstıkalyq ortalyq, ákimshilik ortalyǵy), 56,2 gektary - elektr berý qurylǵylarynyń kerneýi joǵary jelilerin shettetý aımaqtaryna, 275,6 gektary ónerkásip óndiristerin ornalastyrýǵa arnalǵan.
