Almatynyń hırýrgteri aýyr jaraqat alǵan mototsıklshi bozbalany aıaǵynan tik turǵyzdy
ALMATY. QazAqparat – Almatydaǵy №4 qalalyq klınıkalyq aýrýhananyń qabyldaý bólimine myqyn býynyna túsken sırek ári kúrdeli jaraqatpen 17 jastaǵy jigit jetkizilgen. Bozbala mototsıklden qulap jaraqat alǵan, dep habarlaıdy QazAqparat tilshisi.
«Kompıýterlik tomografııa júrgizilip, dıagnoz qoıyldy: ortan jiliktiń bas jaǵy synǵan, janshylǵan, ortan jilik jambastan taıyp ketken. Mundaı jaǵdaılar jol-kólik oqıǵasy kezinde kezdesedi», - dep habarlaıdy qalalyq densaýlyq saqtaý basqarmasynan.
Ortan jiliktiń jambastan shyǵyp ketýi – aýyr jaraqat. Ony jazý úshin ortan jiliktiń shyǵyp ketken bas jaǵyn shuǵyl alyp tastaý kerek. Aýyr ota qajet. Jedel em-dom qabyldaý úshin kompıýterlik tomografııa jasalýy tıis.
Jaǵdaı sırek kezdesetindikten emhana dárigerleri AQSh-tyń jetekshi mamany Djoldas Kuldjanov, MD, St-Louis-pen jambastyń synýyna qatysty onlaın keńes ótkizdi. Otanyń jospary, emdeý men ońaltý ádisi maquldandy. Statsıonardyń dárigerleri patsıentke 3 saǵat boıy ota jasady.
«Bálkim, biz patsıentti dál osyndaı jas kezinde jambas býynynyń erteden endoprotezdenýinen qutqaryp alǵan sekildimiz. Otadan keıin esin jıǵan soń jas jigit eń birinshi kezekte mototsıklge otyrmaýǵa ýáde berdi. Jaz aılary – motojaraqattardyń kezeńi. Biz jolda abaı bolýǵa, jyldamdyq rejımin saqtap, muqııat júrýge shaqyramyz», - dedi №4 qalalyq klınıkalyq aýrýhananyń ortopedııalyq hırýrgııa bóliminiń jetekshisi, joǵary sanatty dáriger Meırambek Jumagulov.
Qazirgi ýaqytta jas jigit aýrýhanadan emdelip, óz aıaǵymen shyǵyp ketken.
Otany №4 qalalyq klınıkalyq aýrýhananyń travmatologııa men hırýrgııa salasyndaǵy jetekshi mamandar jasaǵan.
