Almatynyń haıýanattar baǵynda kókónis qoımasy bar jem-shóp blogy salynbaq

ALMATY. QazAqparat – Almatynyń haıýanattar baǵy evrostandarttarǵa saı bolady. Bul týraly zoobaq dırektory Seıilhan Aqylbekov málim etti, dep habarlaıdy QazAqparat.

Spıkerdiń aıtýynsha, kókónis qoımasy bar jem-shóp blogynyń qurylysy osy aıda bastalady. Ol qosalqy sharýashylyq egistikterinen jáne kúzde arzandatylǵan baǵamen satyp alynǵan kókónister men jemisterdi saqtaýǵa múmkindik bermek.

Sonymen qatar, «Afrıkalyq savanna» keshenin salý josparlanyp otyr. Onda 100-ge jýyq janýardyń 25 túrine deıin ornalastyrylady.

«Jańa ekspozıtsııa paıdalanýǵa berilgennen keıin janýarlardy ustaý sharttary tabıǵı mekendeý ortasyna barynsha jaqyn bolmaq. Ol ekspozıtsııa jyl boıy jumys isteıdi. Qurylys-montajdaý jumystaryn 2024 jylǵa josparlap otyrmyz», - dedi Seıilhan Aqylbekov óńirlik kommýnıkatsııalar qyzmeti alańynda ótken brıfıngte.

Sondaı-aq, haıýanattar baǵynda jalpy aýmaǵy 1,5 gektar bolatyn «Arktıka» kesheni salynady. Osynyń arqasynda haıýanattar baǵy aq aıýlardyń jas jubyn satyp ala alady. Al, ilbis men sileýsin úshin salynatyn qorshaý Almaty qalasy men Іle Alataýynyń sımvolyn (qar barysy) kórsetýge múmkindik beredi. 2024 jyly «Tropıkalyq jumaq nemese maımyldar eli», «Madagaskar», «Qazaq dalasy» keshenderiniń qurylysy da josparlanǵan. Sonymen birge, jańa veterınarlyq klınıka salý, jabaıy janýarlardy reıntrodýktsııalaý ortalyǵy jobalary jasalmaq.

Atalyp ótkendeı, bıyl zoobaqtaǵy 21 janýardan 33 tól alynǵan.

«Bizde kók qoshqar, ponı, kengýrý, jaıra, mysyq lemýrlary, ala buǵy, qodas, Chapman zebrasy, sýsıyr, qaraqus balapandary, qumaı, japon tyrnasy, taý qazy, afrıkalyq sur jylan jáne t.b. tólderi týdy», - dedi Seıilhan Aqylbekov.

Sondaı-aq, bıyl 55 janýar aýyrǵan, bul – baqtaǵy haıýandardyń 1%-dan sál astamy.