Almatynyń gandbolshy qyzdary el chempıonatynda qarsylastarynan basym tústi
ASTANA. QazAqparat - Almatynyń «Dostyq» sport keshenińde gandboldan QR chempıonatynyń ekinshi týry aıasynda qyzdar arasyndaǵy joǵary jáne sýperlıga komandalardyń ekinshi jáne úshinshi oıyndary ótti, dep habarlaıdy QazAqparat qalalyq sport habyna silteme jasap.
Joǵary lıgada óner kórestip júrgen almatylyq ujym «Sever» komandasymen jolyǵyp, 36:23 esebimen basym tústi. Óte tartysty ári qyzyqty ótken oıynǵa jınalǵan jankúıerler almatylyqtardyń qýanyshtarymen ortaqtasty.
Sonymen qatar, sýperlıgada ótken oıyndar da el nazarynan tys qalmady. «Almaty» men «Astana» komandasy birinshi bolyp bastaǵan oıynda 50 gol soǵylyp, kóptegen nátıjesiz sátter de az bolmady. Arsen Berdibekovtyń shákirtteri 33:17 esebimen astanalyqtardy utyp osy týrdaǵy ekinshi jeńisine kol jetkizip, alǵa shyqty. Birinshi ótken kezdesýde alań qojaıyndary «Altaı» klýbyn utqan bolatyn.
- Barlyq oıynshylarym nátıjeli oıyndar kórsetýde. Olar jankúıerlerine qýanysh syılap, meniń nusqaýlarymdy oryndap júr. Men rızamyn. Alda qıyn oıyndar kútip tur. Barlyǵyn utý kerek degen maqsat qoıdyq. Bıyl da jeńiske jetýimiz kerek, - dedi «Almaty» GK bapkeri Arsen Berdibekov.
Sonymen qatar, Arsen Berdibekov joǵary lıgaǵa qatysyp júrgen jas qyzdardan da úmiti zor ekendigin aıtyp ótti. Sebebi olardy bilikti mamandar daıyndap, barlyǵy da keleshekte jaqsy oıynshy bolatyndyǵyna senimdi.
Aıta keter jaıt, osy maýysymda joǵary lıgada 11, al sýperlıgada 6 qyzdar komandasy óner kórsetýde. El chempıonatynyń ekinshi týry osy senbi kúni 21-shi qazan kúni aıaqtalady.
