Almatynyń eks-bas qarjy polıtseıine qatysty sot úkimi shyqty
ALMATY. QazAqparat - Almaty Qarjy polıtsııasynyń burynǵy basshysy Ámirhan Amanbaev jáne iske qatysty qylmystyq toptyń 35 múshesine sot úkimi shyqty, dep habarlaıdy QazAqparat tilshisi.
Sot úkimimen Amanbaev jalǵan kásipkerlikpen aınalysýǵa kómekteskeni, qylmystyq qaýymdastyq quryp, oǵan jetekshilik etkeni, aqsha jymqyryp, qyzmet babyn asyra paıdalanǵany, para alǵany úshin jeke múlki tárkilene otyryp, ómirbaqı memlekettik qyzmette qyzmet isteı quqyǵynan aıyryla otyryp, 14 jylǵa bas bostandyǵynan aıyryldy. Ol jazasyn qatań rejimdegi túzeý kolonııasynda óteıtin boldy.
Sonymen qatar, sot ony «Qurmet», 2-shi dárejeli «Dańq» ordenderinen, «ІІІ synypty memlekettik keńesshisi» sheninen aıyrý týraly Qazaqstan Prezıdentine usynys shyǵaryldy.
Sot onyń uıymdasqan qylmystyq toppen jalǵan fırmalar arqyly 111 mlrd teńge qolma-qol aqsha alǵanyn anyqtady. Keltirilgen materıaldyq shyǵynnyń jalpy somasy 31 mlrd teńge.
Sotqa deıingi tergeý amaldary barysynda jáne istiń sot qaraýynda bolǵanynda memleket kirisine 8 mlrd teige qaıtaryldy.
Іske qatysty ózge sottalýshylar Sergeı Ilın jáne Nurlan Shaýkerov jalǵan kásipkerlikpen aınalysyp, qylmystyq top qurǵany jáne jetekshilik etkeni jáne para berip, aqsha jymqyrǵany úshin sot úkimimen jeke múlki tárkilene otyryp, ómi boıyna basshylyqqa qyzmetke ornalasýyna tyıym salyna otyryp, 16 jylǵa bas bostandyqtarynan aıyryldy.
«Іske qatysty bir adamnyń kinásiz ekenin dáleldendi. Ony zańsyz qylmystyq iske tartylǵany úshin shyǵyn óteletin bolady. E.Baýdınova, I.Karpınskaıa, M.Avazbaeva, D.Shımovalarǵa sot gýmanızm tanytyp, olardyń jas balalary bar ekenin ári júktiligin eskere otyryp jazany keıinge shegerý týraly sheshim shyǵardy», - dedi qalalyq sottyń baspasóz qyzmetinen.
Qalǵan 26 adamǵa sot úkimimen 4 jyldan 10 jyl aralaǵynda jeke múlki tárkilene otyryp, ómirbaqı jetekshilik qyzmetke taǵaıyndalý quqyǵynan aıyryla otyryp, qatań rejimdegi túzeý kolonııasynda jaza óteý taǵaıyndaldy. Sot sottalýshylardan memleket qazynasyna 1 872 000 000 teńgeniń múlkin tárkilep aldy. Sottalýshylar tarapynan memleket qazynasyna 1 980 444 9636 teńge óndirildi.
Basty sot talqylaýy 3,5 aıǵa sozylyp, barlyǵy 260 kýáger sotta kýálik berdi. Qylmystyq is 1 340 tomnan turady.
Sonymen qatar, atalǵan qylmystyq iske taǵy da birneshe tulǵany tartýǵa jeke qaýly shyǵarylǵan.
Sot úkimi zańdy kúshine engen joq.
Eske sala keteıik, Amanbaev 2015 jyldyń naýryz aıynda ustaldy. Ol úıqamaqta boldy, aılaıda QR QPK 146-babynyń 2-tarmaǵyn buzǵany úshin 2016 jyldyń 28 qarashasynda qamaýǵa alyndy.
