Almatynyń ekologııalyq jaǵdaıyn jaqsartýǵa qatysty tyń qadamdar jasalady
Atap aıtqanda, búgin Senat «Keıbir zańnamalyq aktilerine elektr energetıkasy, energııa únemdeý jáne energııa tıimdiligin arttyrý, jer qoınaýyn paıdalaný, jergilikti memlekettik basqarý jáne memlekettik shekara máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujat aıasynda Almatyǵa qatysty tıisti sheshimder eskerilgen.
«Almatynyń taǵy bir ózekti máselesi – ol qalanyń ekologııalyq jaı-kúıi. Búginde lastanýdyń negizgi kózderi retinde kólik sektory jáne ekinshi jylý energııa ortalyǵy bolyp otyr. Olarǵa gaz shyǵaryndylarynyń 60% jáne 31% tıesili. Normatıvten tys shyǵaryndylary bar (ekologııalyq beketterde) avtokólik quraldaryna qatysty ólshemdi júzege asyrý jáne anyqtaý tártibin reglamentteý eskerilgen. Osy oraıda kólik quraldaryna tıisti ólshemdi júzege asyrý jónindegi qaǵıdalardy bekitý kózdelgen», - dedi Q. Óskenbaev.
Onyń aıtýynsha, kómir stantsııalarynan parnıktik gaz shyǵaryndylaryn tómendetý boıynsha respýblıkalyq mańyzy bar qalalar men astana úshin otynnyń balama túri retinde gazdy paıdalana otyryp, generatsııalaıtyn qondyrǵylardy salý arqyly jańǵyrtý, rekonstrýktsııalaý jáne keńeıtý jónindegi jobalarǵa ınvestıtsııalardy qaıtarý tetigin zańnamalyq túrde engizý usynylady.
Budan buryn habarlanǵandaı, Almatyda kelisilgen qala qurylysy saıasatyn júrgizý úshin shahardyń dızaın-kody bekitiledi.
