Almatynyń ekologııalyq ahýalyn jaqsartýǵa arsha aǵashtary kómektesedi
ALMATY. Sáýirdiń 14-i. QazAqparat /Erbol Azanbek/ - Almaty kóshelerine bıylǵy kóktemnen bastap arsha aǵashtary otyrǵyzylady.
Olardyń alǵashqylary sáýirdiń 17-i kúni ál-Farabı-Vodozabornyı kósheleriniń qıylysynda otyrǵyzylatyn bolady. Bul týraly búgin arnaıy ótken baspasóz máslıhatynda «Favorıt» yntaly tobynyń ókilderi aıtty, dep habarlaıdy QazAqparat.
«Favorıt» yntaly tobynyń ókili Jansaıa Bolattyń aıtýynsha, arsha aǵashynyń quramy men sapasy óte myqty. Basqa qylqan japyraqtylarǵa qaraǵanda 6 ese, japyraqty ósimdikten 15 ese, sarymsaqtan 20 ese kóp fıtontsıd bóledi. Aýany lastaıtyn zııankesterden 30 paıyz tazartady. Bul basqa aǵashtarǵa qaraǵanda arshanyń ekologııalyq ahýaldy tazartýǵa tıgizer paıdasy mol degen sóz. «Osy jaıttarǵa qarap Almatyǵa arsha aǵashyn otyrǵyzý qajet degen sheshimge keldik», deıdi yntaly top ókili.Onyń aıtýynsha, arsha aǵashyn otyrǵyzý jobasyn júzege asyrý úshin 1023 qala turǵyny arasynda saýalnama júrgizilgen. Olardyń 61,68 paıyzy Almatynyń álemdegi lastanǵan qalalar ishinde 10-shy orynda turǵanynan habardar bolsa, 40,73 paıyzy arsha aǵashynyń aýany kúshti tazartýshy ekeninen habary barlyǵyn bildirgen. Sondaı-aq 80,82 paıyzy densaýlyǵynyń nasharlyǵyn aıtsa, 98,03 paıyz turǵyn aýany tazartý jobasyna úles qosýǵa daıyn ekendikterin bildirgen. Bunymen qatar «Mercur Human Resourse Consalting» kompanııasynyń zertteýi boıynsha, Almaty dúnıe júzindegi 215 qalanyń ishinde lastaný boıynsha 9-shy orynǵa shyǵyp, lastaný ındeksi boıynsha 39,1 kórsetkishine ıe bolǵan.
