Almatynyń eki saıabaǵyna «Prezıdent Nazarbaev» qyzǵaldaqtary otyrǵyzyldy
ALMATY. QazAqparat - Almaty saıabaqtaryna bıiktigi 50 sm bolatyn qyzǵaldaqtyń jańa túri - «Prezıdent Nazarbaev» gúlderi otyrǵyzyldy, dep habarlaıdy QazAqparat tilshisi.
Jańa surypty gollandııalyq selektsıonerler 2014 jyly shyǵarǵan jáne Nursultan Nazarbaevtyń Nıderlandyǵa sapary barysynda tanystyrǵan.
Arada tórt jyl ótken soń, Elbasynyń esimimen atalatyn jańa suryp Almatynyń Ortalyq jáne Tuńǵysh Prezıdent saıabaqtaryna ornatyldy.
«Bul suryp óte tózimdi, sabaqtary berik ári bıik, japyraǵy tolqyndy bolyp keledi. Greıg qyzǵaldaǵyna uqsaıdy, biraq tańbalary joq. Qaýyzy lalagúl tárizdi jáne ortasy qara emes, sary. Iisi de ózgeshe», - dedi Jas natýralıster stansysynyń dırektory Zeınep Arısheva.
Erekshe surypty satyp alý, ósirý jáne kútip-baptaý jumystaryn jeke kompanııa ákimdiktiń qoldaýymen júzege asyrýda.
«Qazir Almatynyń Ortalyq jáne Tuńǵysh Prezıdent saıabaqtaryna 5 myń qyzǵaldaq otyrǵyzdyq. Nıderlandtyq selektsıonerlermen kelisimshart ornatyldy, biz olardyń ókilderi bolyp sanalamyz», - deıdi «Grınlend» JShS dırektory Gúlzada Qaldybaeva.
Mamandardyń aıtýynsha, qyzǵaldaqtar eki apta boıy gúl ashyp turady. Odan keıin almatylyqtar bul gúlderdi kelesi jyly ǵana tamashalaı alady.
«Qazir eki saıabaqqa gúlerdi kóbirek otyrǵyzyp, 100 myńǵa deıin jetkizýimiz kerek. Sodan keıin ǵana bul surypty satylymǵa shyǵara alamyz. Ókinishke qaraı, pııazshyqtardyń 30% ǵana kóbeıýge qabiletti. Kelesi jyly taǵy da satyp alyp, gúlder sanyn kóbeıtemiz», - dep túsindirdi Gúlzada Qaldybaeva.
