Almatynyń eki aýdanynda kólik qozǵalysy ishinara shekteledi
ALMATY. QazAqparat - Almatyda 16-17 tamyz kúnderi jylý jelilerin rekonstrýktsııalaý kezinde birneshe kóshede kólik qozǵalysy ýaqytsha shekteledi, dep habarlaıdy QazAqparat tilshisi.
16 tamyz saǵat 10:00-den keshki saǵat 17:00-ge deıin Áýezov aýdanynda Súleımenov kóshesi boıynda (avtobýs jolaǵy) Toqtabaev pen Pıatnıtskıı kóshesi aralyǵynda kólikter úshin jol jabyq bolady.
Sondaı-aq Túrksib aýdanynda 16 tamyz saǵat 21:00-den 17 tamyz saǵat 06:00-ge deıin Seıfýllın kóshesinen Montına kóshesine deıin (shyǵys baǵytta) kólik qozǵalysy shekteledi.
«Ýaqytsha shekteýler atalǵan kóshe jolynyń astynan ótetin jylý jelilerinde jóndeý jumystaryn júrgizý kezinde qaýipsizdikti qamtamasyz etý úshin engizildi», - dep habarlady «Almaty jylý jelileri» JShS.
Kompanııa keltirilgen qolaısyzdyq úshin almatylyqtardan keshirim surady. Sonymen qatar júrgizýshilerge jol júrý baǵytyn aldyn ala josparlaýǵa keńes berdi.
