Almatynyń egeýquıryqtary nege semiz bolatyndyǵyn mamandar aıtyp berdi
ALMATY. QazAqparat - Almaty kóshelerinde semiz egeýquıryqtar jıi kózge shalynyp qalyp júr. Olardy ortalyq kóshelerde de baıqaýǵa bolady. Kemirgishterdiń kóbeıýi men olarǵa qarsy kúres týraly qalalyq Qoǵamdyq densaýlyqty qorǵaý departamentiniń mamandary aıtyp berdi, dep habarlaıdy QazAqparat tilshisi.
Qalalyq Qoǵamdyq densaýlyq saqtaý departamentiniń mamandary habarlaǵandaı, jyl saıyn departament mamandary men obaǵa qarsy ınstıtýt qyzmetkerleri arnaıy tásil boıynsha kúres júrgizedi.
Ýlaý jumystary júrgizilgen soń kelesi jumystarǵa deıingi 6 aıda egeýquıryqtar kóbeıip úlgeredi. Bir analyq 15 ret týady.
Egeýquıryqtarmen kúreste 3 klassty ýly dáriler bromadıolon, klerat, lanırat, barakı dárilerin paıdalanady.
«Bul ýly qosyndylardyń ereksheligi janýarlar budan birden óle qoımaıdy. Óıtkeni óte saq bolǵandyqtan, ýlanǵan taǵamdy kelesi joly aýzyna almas edi. Ony jegen soń kemirgishter saqtyǵyn joǵaltyp, ashyq dalaǵa shyǵyp ketedi. Dárini jegen soń olar ishteri keýip óledi. Sondyqtan da syrttan semiz bolyp kórinýi múmkin», -dedi departament ókilderi.
Mamandardyń aıtýynsha, bıyl egeýquıryqtar Alataý, Medeý, Áýezov aýdandarynda kóp boldy. Bul atalǵan aýmaqtarda jer úılerdiń kóptigine baılanysty bolyp otyr.
Sondaı-aq bıylǵy 6 aıda 36 adam kemirgishterdiń shabýylyna tap bolǵan. Adamdardyń basym kópshiligin úı kemirgishteri (sý shoshqasy, homıak, atjalmandar) tistep alǵan.
Medıtsına mamandarynyń aıtýynsha, jabaıy kemirgishter oba, qutyrý, ıersınıoz, lısterıoz, pasterellez, leptospıroz, psevdotýberkýlez, týlıaremııa aýrýlarynyń qozdyrǵyshyn tasymaldaýshy retinde belgili.
Qala bıligi zııankes kemirgishtermen kúresti úzdiksiz maýsym saıyn júrgizip keledi.Ol úshin memlekettik tender jarııalanady.
«Ýlaý jumystarynan bólek úı, qoıma taǵy basqa shaǵyn keńistikte kemirgishterdi bezdirýge arnalǵan ýltradybysty quraldar jıi paıdalanylyp keledi. Sońǵy jyldary óńdeıtin aımaqtyń ulǵaıýyna baılanysty 2017 jyly respýblıkalyq bıýdjetten maýsymdyq deratızatsııa jumystaryna 100 myń teńge bólindi», - dedi departament basshysynyń mindetin atqarýshy Ermek Kamelov.
Sonymen qatar qoǵamdyq oryndardy ýlaýdan bólek aýdan ákimdikteri terrıtorııasynda ornalasqan barlyq menshik ıelerin egeýquıryqpen kúresýge jumyldyrady.
