Almatynyń dızaın-kod jobasy kelesi jyly qabyldanady

ALMATY. QazAqparat – 2021 jyly Almaty qalasynyń dızaın-kod jobasy qabyldanady. Bul týraly onlaın brıfıng barysynda qalalyq Josparlaý jáne ýrbanıstıka basqarmasynyń basshysy Almashan Ahmedjanov málim etti, dep habarlaıdy QazAqparat tilshisi.

Onyń aıtýynsha, qazir qalanyń barlyq sýbektilerinen dızaın-kod boıynsha usynystar men eskertpeler jınaqtalýda.

«Dızaın-kod boıynsha júrgizilip jatqan jumystardy jyl sońyna deıin aıaqtaımyz dep oılaımyn. Kelesi jyldan bastap dızaın-kod jobasyn resmı túrde qabyldaımyz. Bul – Almatydaǵy arhıtektýralyq sheshimderdi damytýdy qamtamasyz etedi. Kásipkerler úshin de, qalalyqtar úshin de – biryńǵaı standartty qujat», - dedi Almashan Ahmedjanov.

Dızaın-kod – qalany, qala kóshelerin, qoǵamdyq aımaqtardy bezendirýdiń biryńǵaı sáýlettik stıli. Jobanyń maqsaty – ǵımarat qasbetteriniń elementterine qoıylatyn biryńǵaı talapty ázirleý: kireberis, mańdaıshalar, aqparattyq taqtalar, balkon qorshaýlary, aýabaptaǵysh jáne t.b.