Almatynyń densaýlyq salasynda oń dınamıka qalyptasty
ALMATY. QazAqparat - Almatynyń densaýlyq salasynda oń dınamıka qalyptasty. Bul týraly búgin qalalyq Densaýlyq saqtaý basqarmasynyń basshysy Serikbol Mýsınov aıtty, dep habarlaıdy QazAqparat tilshisi.
Alqa keńesiniń keńeıtilgen otyrysynda basqarma basshysy 2017 jylǵy jumys qorytyndylary men 2018 jylǵa qoıylǵan mindetter boıynsha esep berdi.
Alqa keńesine Almaty qalasy ákiminiń orynbasary Marat Dáribaev, Qazaqstan Respýblıkasy Densaýlyq saqtaý mınıstrliginiń, Áleýmettik medıtsınalyq saqtandyrý qorynyń, Dúnıejúzilik densaýlyq saqtaý uıymy halyqaralyq uıymdarynyń ókilderi, AFEW International, UNAIDS (ıÝNEIDS) ókilderi, ǵylymı-zertteý ınstıtýttary men ǵylymı ortalyqtardyń basshylary, medıtsınalyq joǵary oqý oryndarynyń, Qazaqstan Respýblıkasy Densaýlyq saqtaý mınıstrliginiń aýmaqtyq komıtetteriniń jáne Respýblıkalyq elektrondyq densaýlyq saqtaý ortalyǵy óńirlik fılıaldarynyń basshylary, densaýlyq saqtaý júıesiniń eńbek sińirgen qaıratkerleri, basqarma alqa keńesiniń músheleri jáne medıtsınalyq uıymdardaǵy baıqaý keńesteriniń músheleri, shtattan tys jetekshi mamandar jáne qalanyń medıtsına qyzmetkerleri qatysty.
Densaýlyq saqtaý basqarmasy qala ákimdiginiń jáne QR DSM qoldaýymen 2017 jyly densaýlyq saqtaý salasyn damytýdyń birneshe baǵdarlamasy aıasynda keshendi sharalardy júzege asyrǵan bolatyn.
Atap aıtqanda, 2016-2019 jyldarǵa arnalǵan «Densaýlyq» memlekettik baǵdarlamasyn, Elbasy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna joldaýyn jáne Almaty qalasyn damytýdyń 2016-2020 jyldarǵa arnalǵan baǵdarlamasyn iske asyrý sheńberinde birshama jumystar atqaryldy.
Basqarma basshysy Serikbol Mýsınovtyń aıtýynsha, 2017 jyl oń nátıjelermen aıaqtaldy.
Atap aıtqanda, nəreste ólimi - 7%-ǵa, týberkýlezden bolatyn ólim - 8%-ǵa tómendedi. Jazataıym oqıǵalardan, jaraqattardan jáne ýlanýdan bolatyn ólim kórsetkishi 21%-ǵa tómendedi. Bul kórsetkish boıynsha memleket ishinde Almaty 3-shi orynda tur. Qaterli isikten bolatyn ólim - 7,5%-ǵa azaıyp, qaterli isikteri bar naýqastardyń ómiri 2,9%-ǵa ósimmen baıqalady. Halyqtyń týberkýlezben syrqattanýy 4,4%-ǵa tómendedi.
Semizdiktiń taralýy 24%-ǵa tómendedi. Esirtkige táýeldilikpen narkologııalyq esepte turatyn adamdar sany 17%-ǵa azaıǵan.
"Barlyq osy jetistikterge ákimdiktiń qurylymdyq bólimsheleriniń júrgizgen sektoraralyq jáne vedomstvoaralyq ózara is-qımylynyń nátıjesinde, sondaı-aq qalanyń medıtsına qoǵamynyń osy iske salǵan kúshiniń arqasynda qol jetkizildi. Densaýlyqtyń negizgi ındıkatorlaryna qol jetkizý óńirdiń áleýmettik saýlyǵy men onda turatyn turǵyndar densaýlyǵynyń yqpaldastyrylǵan ındıkatorlarynyń biri - halyqtyń kútiletin ómir súrý uzaqtyǵy turaqty túrde ósip jatqanyn kórsetti - 75,9 jyl. Bul memleket boıynsha úzdik nátıje", -dedi Serikbol Mýsınov.
Onyń aıtýynsha, 2017 jyly «Densaýlyq» memlekettik baǵdarlamasyn iske asyrý 73 is-shara boıynsha júzege asyryldy. Olardyń ishinen 23-i bıyl júzege asty.
Byltyr qalada Densaýlyq saqtaý salasyndaǵy memlekettik baǵdarlamalardy júzege asyrýǵa 17,7 mlrd teńge jumsaldy.
