Almatynyń densaýlyq saqtaý júıesi kezeń-kezeńimen jańartylady

ALMATY. QazAqparat- Prezıdent Joldaýyn iske asyrý jónindegi qala aktıviniń jınalysynda Almaty qalasynyń ákimi Baqytjan Saǵyntaev medıtsınalyq mekemelerdiń materıaldyq-tehnıkalyq jabdyqtalýyna júrgizilgen tekserý nátıjelerin aıtty, dep habarlaıdy QazAqparat tilshisi.

Almaty ákimi Baqytjan Saǵyntaevtyń aıtýynsha, qala emhanalaryndaǵy medıtsınalyq jabdyqtarda 20%-dan 80%-ǵa deıin aıyrmashylyq bar. Medıtsınalyq uıymdarda 30 myńnan astam qural-jabdyq bar. Onyń 11 myńǵa jýyǵy - eski.
«Medıtsınalyq tehnıkany satyp alýǵa 86 mıllıard teńgeden astam qarjy bólý josparlanyp otyr. 2020 jyly 1,4 myń medıtsınalyq jabdyq satyp alynady. Kelesi jyly jedel járdem qyzmeti úshin 80 avtomobıl alynady»,-dedi Baqytjan Saǵyntaev.
Jedel kardıologııalyq kómek kórsetý úshin qalanyń úsh aýrýhanasynda kardıologııalyq bólimder ashý josparlanǵan. 2019 jyldyń qazan aıynda Alataý aýdanynda jedel járdem qyzmetiniń jańa qosalqy bólimshesi paıdalanýǵa berildi. Barlyq aýdandarda 35 otbasylyq dárigerlik ambýlatorııa ashylady.
«Áleýmettik qyzmetterdiń sanyn kóbeıtip, sapasyn jaqsartamyz. Ásirese, densaýlyq saqtaý salasynda, ortalyq pen shalǵaı aýdandar arasyndaǵy alshaqtyq azaıady», - dedi B.Saǵyntaev.