Almatynyń damý baǵdarlamasy qala turǵyndarynyń ashyq talqylaýyna túsedi
Jıyn barysynda qalanyń damý baǵdarlamasyn qabyldaý kezinde qala turǵyndarynyń pikiri eskeriletini aıtyldy.
Baǵdarlama jobasy erteń almaty.gov.kz saıtynda jarııalanyp, kópshiliktiń talqysyna túsetin bolady. Qala turǵyndary kelesi aıǵa deıin usynystaryn almaty2020@a-a.kz elektrondy mekenjaıyna jibere alady.
Bul - Nursultan Nazarbaevtyń Ult josparynyń 100 naqty qadamyn is júzinde júzege asyrýdyń bir tetigi, deıdi mamandar.
Atalǵan jobany jasaýǵa memlekettik organdardyń ǵana emes, belgili «McKinsey&Company» kompanııasynyń sarapshylary tartyldy.
Sondaı-aq, damý baǵdarlamasyn jan-jaqty talqylaıtyn qoǵamdyq keńes qurylady. Oǵan qaladaǵy bedeldi úkimettik emes uıymdar men qarjy ınstıtýttarynyń, salalyq qaýymdastyqtardyń ókilderi, qoǵam qaıratkerleri kiredi. Jaqyn arada salalyq toptardyń suhbat alańy uıymdastyrylady.
«Almaty-2020» baǵdarlamasynda damýdyń 7 negizgi baǵyty qarastyrylǵan: jaıly qala, qaýipsiz qala, áleýmettik qala, ekonomıkalyq turaqty qala, jeke kapıtal men bızneske jaıly qala, belsendi azamattar qalasy, beıimdelgen qala.
«Qalanyń eń basty baılyǵy adamdar, olardyń shyǵarmashylyq áleýeti men aqyl-oıy. Qazirgi tańda eshbir qalanyń damýy turǵyndardyń belsendi aralasýynsyz sheshilmeıdi. Ortaq máseleni sheshýge baǵyttalǵan ortaq múdde qala damýynyń basty qozǵaýshy kúshi. Almaty - belsendi azamattar qalasy. Munda azamattyq qoǵam ashyq damyp keledi», - dedi qala ákimi Baýyrjan Baıbek.
