Almatynyń Call-ortalyǵyna bir táýlikte 4 myń adam habarlasqan
ALMATY. QazAqparat - Almatyda karantınniń engizilýine baılanysty qalalyq Polıtsııa departamentinde Call-ortalyq quryldy. Jedel jelige bir táýlik ishinde 4 myńnan asa qońyraý túsken, dep habarlaıdy QazAqparat tilshisi.
«Bir táýlikte 4 myńnan astam adam kóp arnaly nómirge qońyraý shaldy. Olardyń kópshiligin Almaty qalasynan karantındik aımaqtyń perımetri boıynsha ótkizý pýnktterinen kirip-shyǵý máselesi alańdatty. Keıbir qońyraý shalýshylarǵa keńes pen qoldaý qajet boldy. Árıne, polıtsııanyń qyzmetine qatysy joq máseleler de boldy. Múmkindiginshe polıtsııa qyzmetkerleri olarǵa da saýatty jaýap berýge tyrysty. Aldyn ala taldaý nátıjeleri boıynsha, alǵashqy 2-3 kúnde senim telefonyna kóptegen qońyraýlar túsedi. Azamattardy qyzyqtyratyn suraqtarǵa jedel jaýap berý óte mańyzdy», - dedi Polıtsııa departamentiniń resmı ókili Saltanat Ázirbek.
Sonymen birge, polıtsııa Call-ortalyqqa psıhologtar men polıtsııanyń saptyq emes bólimsheleriniń qyzmetkerlerin jumyldyrǵan.
Eske salaıyq, 19 naýryz saǵat 00.00-den bastap Almaty men Nur-Sultan qalalarynda karantın rejımi engizildi.
