«Almatynyń burynǵy ákimi V.Hrapýnovqa qatysty qylmystyq is qupııa júrgiziledi» - respýblıkalyq basylymdarǵa sholý
***
«Keshe Elbasy Nursultan Nazarbaev Almaty qalasynda salynyp jatqan metro qurylysy nysanynda bolyp, tasymal qyzmetiniń iske qosylý sharasyna qatysty. «Abaı» jáne «Jibek joly» stansalary aralyǵyndaǵy baǵytty júrip ótken Prezıdent elimizdegi tuńǵysh metro qyzmetiniń alǵashqy jelisiniń qosylar mezgiline, qyzmet kórsetý sapasy men azamattardyń qaýipsizdik sharasy sekildi birqatar máselelerge nazar aýdardy», - dep jazady «Egemen Qazaqstan» gazeti. Basylymnyń atap ótýinshe, Almaty metropolıteniniń alǵashqy kezegin bıyl jeltoqsanda, Qazaqstan táýelsizdiginiń 20 jyldyǵyna oraı tapsyrý kózdelip otyr. Birinshi jeliniń quramyna jalpy uzyndyǵy 8,56 km. bolatyn 7 stansa kiredi. Tolyǵyraq «Elbasy Almaty metrosymen júrip ótti» degen maqaladan bile alasyzdar.
Prezıdent Nursultan Nazarbaev halyqqa bıylǵy Joldaýynda: «Ómir boıy bilim alý árbir qazaqstandyqtyń jeke kredosyna aınalýy tıis» dep atap ótkeni málim. Shynynda, úzdiksiz bilim alý táýelsiz eldiń árbir azamatynyń basty paryzy bolsa kerek. «Bilimdi myńdy jyǵady» degen ataly sóz de tegin aıtylmaǵan ǵoı. Osy turǵydan kelgende, eldigimizdi alyp, eńsemizdi tiktegen kúnnen bastap Elbasy áskerı bilim berý isin de aldyńǵy orynǵa qoıyp, sonyń arqasynda Otanymyzdyń qarýly kúshteri bilimdi de bilikti sarbazdarmen tolyǵyp otyr. Qazirgi tańda Qorǵanys mınıstrligine bes joǵary, bir tehnıkalyq jáne kásiptik oqý orny men jalpy bilim beretin bir orta mektep qaraıdy. Mine osy bilim ordalaryndaǵy bilim úderisi jaıynda «Egemen Qazaqstan» gazetindegi «Áskerı oqý oryndary memlekettik bilim baǵdarlamasy aıasynda jumys isteıdi» degen maqaladan egjeı-tegjeıli bile alasyzdar.
***
Almaty qalasynyń burynǵy ákimi Vıktor Hrapýnovqa qatysty qozǵalǵan qylmystyq is qupııa túrde júrgiziledi. Bul týraly «Aıqyn» gazetindegi «Qylmystyq is qupııa júrgiziledi» degen maqalada keńinen baıandalǵan. «Qarjy polıtsııasy 27 mamyrda Almaty qalasynyń burynǵy ákimi Vıktor Hrapýnovtyń ústinen Qylmystyq kodekstiń 308-baby boıynsha eki qylmystyq is qozǵaǵan bolatyn. Almaty qalasy prokýrorynyń birinshi orynbasary Tımýr Súleımenovtiń málimdeýinshe, tergeý múddesine qaıshy keletin jaǵdaıda, Qazaqstan Respýblıkasynyń qylmystyq-protsessýaldyq kodeksiniń 205-baby talaptaryna sáıkes, bul aldyn ala tergeý jarııalylyqqa jatpaıtyn bolyp shyqty», - dep jazady basylym.
Baǵa birtindep ósip keledi. Oǵan kúnde dúkenge kirgen saıyn kóz jetkizesiń. «Túý, aqshanyń quny qalmaı barady» dep bir keıısiń de qoıasyń. Basqa qolyńnan keler ne bar? Osy máseleni kótergen «Aıqyn» gazeti «Baǵa jaıly boljam shyndyqqa aınalyp keledi» degen taqyryppen maqala basty. Jarııalanymǵa tuzdyq retinde qarjyger Ǵalym Baınazardan alynǵan shaǵyn suhbatty da qosa berip otyr. «Ras, ınflıatsııa deńgeıi belgilengen mólsherden asyp ketýi múmkin bolyp tur. Bul týraly Halyqaralyq valıýta qory mamandary da mamyr aıyndaǵy málimdemesinde aıtqan bolatyn. Osy sóz shyndyqqa aınalyp keledi. Biz birinshi jartyjyldyqtyń esepterine taldaý jasap otyrmyz. Bul kórsetkishterge qaraǵanda, ınflıatsııa deńgeıi belgilengen mólsherden artyqtaý», - deıdi qarjyger.
***
Bıyldan bastap ásker qataryna alynatyn bozbalalardyń densaýlyǵy ǵana emes, dinı kózqarasy da esepke alynatyn bolady. Ásirese bolashaq sarbazdyń lańkestik dinı uıymǵa qatysynyń bar-joqtyǵy jiti tekserilmek. Mamandardyń aıtýynsha, áskerı boryshyn ótep júrgen azamattarǵa dinı ǵıbattardy qatar alyp júrý múmkin emes. Degenmen bolashaq sarbazdardy dinı kózqarasyna qaraı irikteýdi qatelik dep sanaıtyn sarapshylar da tabylýda. Bul jaıynda tereńirek bilgińiz kelse, «Alash aınasy» gazetiniń turaqty «Oı-kókpar» aıdarynda «Áskerge shaqyrylǵandardyń dinı kózqarasyn tekserý kerek pe?» degen taqyryptaǵy aýǵan soǵysynyń ardageri Bolat Saılan men «Kvorým.kz» saraptamalyq tobynyń dırektory Ádil Kákenovtiń bir-birine kereǵar pikirlerin oqyńyz.
«Alash aınasy» gazetiniń turaqty «Dat!» aıdarynda ónertapqysh Almat Salǵaramen aradaǵy suhbat «Alash» júıesi ulttyń atyn álemge tanytsa dep armandaımyn» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Alash» júıesi - avtokóliktiń belgilengen jyldamdyq sheginen asýyna múmkindik bermeıtin, jyldamdyqty májbúrlep shekteıtin, júrgizýshi qansha tyrysyp, temir tulparyn «tebinse de» jyldamdyqty shekten asyra almaıtyn yryqtandyrǵysh «qudireti» bar qurylǵy», - deıdi óz ónertabysyn tanystyra kelip.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev Almatydaǵy rezıdentsııasynda Almaty qalasynyń ákimi Ahmetjan Esimovti qabyldady. A. Esimov Prezıdentti megapolıstiń áleýmettik-ekonomıkalyq damý barysy týraly habardar etti. «Kezdesýdiń qorytyndysy boıynsha Memleket basshysy Almaty qalasynyń ákimine birqatar tapsyrmalar berdi», - dep jazady basylym.
