Almatynyń Botanıkalyq baǵy qalaı ózgeredi
ALMATY. QazAqparat - Almatydaǵy botanıkalyq baqtyń bolashaqta kelbeti qandaı bolyp ózgeredi? Bul týraly QR BǴM Ǵylym komıteti Botanıka jáne fıtoıntrodýktsııa ınstıtýtynyń basshylary aıtyp berdi, dep habarlaıdy QazAqparat tilshisi.
Bıyl atalǵan ınstıtýttyń qurylǵanyna 85 jyl tolady. Osy ýaqyt aralyǵynda Botanıkalyq baq eki ret qaıta jańǵyrtý sharalarynan ótti.
2014 jyly ınstıtýt mamandary halyqaralyq ozyq tájirıbelerge jáne Qazaqstan zańnamasyna súıene otyryp, damý jáne qaıta jańǵyrtý tujyrymdamasyn qabyldady.
2014 jyldyń mamyrynda sol kezdegi mınıstr Aslan Sárinjipov Baqtyń damý tujyrymdamasyn jasaý úshin vedomstvoaralyq top qurý týraly buıryq shyǵarǵan edi. 2015 jyly baqtyń Damý qory quryldy. Bul tujyrymdamalardyń barlyǵy 2016 jyly qoǵamdyq keńeste maquldandy.
«Qazirgi tańda 1:500 masshtabta topografııalyq túsirilim jasaldy. Barlyq aryqtar men ınjenerlik jelilerdiń qurylysy kórsetilgen. Bul karta qalalyq ákimdikpen kelisilgen. Qyzyl jeliler syzyldy. 1:200 masshtabynda 20 myń aǵashtyń ornalasýy tirkeldi.
Baq ishinde koreıalyq tehnologııa boıynsha jylyjaı kesheni salyndy. Munda 450 sharshy metr aýmaqtaǵy ósimdikter avtomatty rejimde kútiledi.
«Dekoratıvti gúlderdiń arnaıy ýchaskesi salynyp, emdik ósimdikter, jabaıy jemis beretin ósimdikter, alpınarıı qorshaldy», - dedi Instıtýttyń bas dırektory Gúlnar Sıtpaeva.
Sondaı-aq, baq ishinde bolashaqta gerbarıı qory, tuqym banki, konferents-zal, bıblıoteka men ósimdik áleminiń mýzeıi ashylady.
Nysannyń ishinde elektrondy gıd úsh tilde ekskýrsııa júrgizetin bolady.
«Tujyrymdama boıynsha Tımırıazev pen ál-Farabı kóshelerinen kireberis jasalady. Jańa ákimshilik ǵımarat biregeı dızaınmen jasalady. Munda jańa oranjereıalar, klımatron, jylyjaılar, shaı úıi, oıyn alańdary, músinder baǵy, aǵash astyndaǵy kópir, júrekter baǵy, ósimdikterden jasalǵan shytyrman joldar ashylady. Kontsept-dızaın boıynsha Botanıkalyq baqta wi-fi bolady. Jańa sýǵarý júıesi, jańa kúzet júıesi iske qosylady»,- dedi ol.
