Almatynyń botanıkalyq baǵy ákimdik qaramaǵyna berile me – komıtet jaýaby
NUR-SULTAN. QazAqparat – Almaty qalasynyń Bas botanıkalyq baǵy QR BǴM qaramaǵynan alynyp, ózge mınıstrlikke beriledi, dep habarlaıdy QazAqparat.
Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet aıtty.
«Almaty qalasynyń Bas botanıkalyq baǵy (Botanıka jáne fıtoıntrodýktsııa ınstıtýty) Qazaqstan Respýblıkasynyń aıryqsha qorǵaýyndaǵy tabıǵı aýmaq bolyp sanalady. QR Bilim jáne ǵylym mınıstrligi Ǵylym komıtetiniń vedomstvalyq baǵynyshty uıymy bolyp sanalady. Botanıkalyq baqty Almaty ákimdiginiń qaramaǵyna ótkizý máselesi qoıylǵan emes. Sáıkesinshe, bul jer aıryqsha qorǵaýyndaǵy tabıǵı aýmaq tiziminen alynbaıdy», - dep túsindirdi Sáken Dildahmet Facebook jelisinde.
Onyń aıtýynsha, qazirgi ýaqytta Úkimet Botanıkalyq baqty QR Bilim jáne ǵylym mınıstrligi balansynan shyǵaryp, QR Ekologııa, geologııa jáne tabıǵı resýrstar mınıstrligine aýystyrý máselesin qarastyrýda.
