Almatynyń birneshe kóshelerine bir baǵyttyq qozǵalys engiziledi
ALMATY. QazAqparat - Almatyda kishi kólik aınalma shekarasyndaǵy Jambyl, Qarasaı batyr, Qabanbaı batyr, Bógenbaı batyr, Gogol, Muratbaev jáne Sháripov kóshelerine bir baǵyttyq kólik qozǵalystary engiziledi, dep habarlaıdy QazAqparat tilshisi.
Kólik qozǵalysy Maqataev kóshesiniń boıymen Qaldaıaqov kóshesinen Muqanov kóshesine deıin batys baǵytta, Gogol kóshesiniń boıymen Áýezov kóshesinen Qaldaıaqov kóshesine deıin shyǵys baǵytta júrgiziletin bolady.
Bógenbaı batyr kóshesiniń boıynda kólik qozǵalysy Qaldaıaqov kóshesinen Masanchı kóshesine deıin shyǵys baǵytta júredi.
Qarasaı batyr kóshesiniń boıynda batys baǵytta, Masanchı kóshesinen Rozybakıev kóshesine deıin, Jambyl kóshesiniń boıynda Rozybakıev kóshesinen Masanchı kóshesine deıin kólik qozǵalysy shyǵys baǵytta júrgiziledi.
Muratbaev kóshesiniń boıymen Raıymbek dańǵylynan Shevchenko kóshesine deıin ońtústik baǵytta, Sháripov kóshesiniń boıymen Abaı dańǵylynan Maqataev kóshesine deıin qozǵalys soltústik baǵytta júretin bolady. 
Qala ákimdigi baspasóz qyzmetiniń málimetinshe, bul ózgerister kólikten keletin qaýipti 50% azaıtýǵa, apatty jaǵdaılardy qysqartýǵa, negizgi magıstraldy kóshelerde kólik ótkizý qabiletin arttyrýǵa yqpal etedi.
«Gogol, Maqataev jáne Qabanbaı batyr kósheleri boıynda qoǵamdyq kólikteri úshin arnaıy jolaq jasalady, bul qaladaǵy kólik qozǵalysynyń kedergisiz ótýine kómektesedi. Qalada jol qozǵalysy qaýipsizdigin qamtamasyz etý úshin jyldamdyqty tómendetý isi qolǵa alyndy. Osyǵan sáıkes joǵaryda atalǵan ýchaskelerde júrý jyldamdyǵy 40 km/saǵat bolyp bekitildi. Kólik qozǵalysynyń jańa syzbasy 5 tamyzynda engiziledi»,-dep habarlady ákimdik.
Eske salsaq, ótken jyly bir baǵyttaǵy kólik qozǵalysy Shevchenko jáne Qurmanǵazy kóshelerine engizilgen edi.
