Almatynyń birqatar mektebinde bastaýysh synyptardyń sabaqtary toqtatyldy
ALMATY. QazAqparat - Almatynyń birqatar mektepterinde bastaýysh synyptardyń sabaqtary toqtatyldy, dep habarlaıdy QazAqparat tilshisi Almaty qalasy Bilim basqarmasy basshysynyń mindetin atqarýshy Lázzát Jylqybaevaǵa silteme jasaı otyryp.
Almaty qalasy Bilim basqarmasy Alataý aýdany «Zarıa-Vostok» yqshamaýdanyndaǵy №150 mektepte, Bostandyq aýdany Nurlytaý yqsham aýdanyndaǵy №190-shy jáne «Qazaqfılm» yqsham aýdanyndaǵy №88, №70 mektepterde sabaqtardy ýaqytsha toqtatqan.
Sonymen qatar, Bilim basqarmasynyń sheshimimen Naýryzbaı aýdany Qaraǵaıly yqsham aýdanyndaǵy №192 mektep pen Medeý aýdany Alataý aýylyndaǵy №7 mektepte bastaýysh synyptary mektepke barmaıtyn boldy.
Lázzát Jylqybaevanyń aıtýynsha, bul mektepter Almatynyń taýǵa jaqyn yqsham aýdandarynda ornalasqan.
«Máselen, «Qazaqfılmde» tańǵy 5-te -29 gradýs bolǵan. Osyǵan baılanysty tańerteń birqatar mektepte bastaýysh synyptarda sabaq toqtatý týraly sheshim shyǵardyq», - dedi ol.
Aıta keteıik, keshe Almaty qalasy boıynsha TJD baspasóz qyzmetiniń jetekshisi Sandýǵash Baımuhambetova -25 gradýs aıazǵa ekpindi jel qosylǵanda Almaty mektepterindegi bastaýysh synyptarda sabaq toqtatylatynyn eskertken bolatyn.
